Bir çox insan yuxu pozuntuları və yuxusuzluqdan əziyyət çəkir. Gecə istirahətini tənzimləməyə kömək edə biləcək iki əlavə maqnezium və melatonindir. Bəs onları eyni anda qəbul etmək olarmı və yuxuya necə təsir edirlər?
HİT.az xəbər verir ki, “EatingWell” portalı bu mövzunun bütün detallarını izah edib.
“Maqnezium və melatonin yuxunu fərqli, lakin bir-birini tamamlayan yollarla dəstəkləyə bilər. Melatonin yuxuya getmə vaxtını tənzimləyir, maqnezium isə orqanizmin rahatlamasına kömək edə bilər”, deyə diyetoloq Olayde Adejumobi bildirir.
Maqnezium və melatonin nədir?
Maqnezium orqanizmdə ən geniş yayılmış minerallardan biridir və 300-dən çox biokimyəvi reaksiyada iştirak edir. Dietoloq Emili Kiların sözlərinə görə, maqnezium əlavələri sinir sisteminin oyanıqlığını azaldaraq, əzələləri rahatlaşdıraraq və sirkad ritmləri tənzimləyərək yuxunu yaxşılaşdıra bilər.
Melatonin isə yuxu və oyaqlıq dövrünü tənzimləyən hormondur. Qaranlıq düşəndə beyin melatonin ifraz edir və bu, “yatmaq vaxtıdır” siqnalı verir. Parlaq işıq, xüsusilə ekranlardan gələn mavi işıq, melatonin istehsalını azaldır.
Melatonin əlavələri bədən temperaturunu aşağı salaraq, yuxuya getməyə kömək edir, sirkad ritmləri tənzimləyir və yuxu müddətini uzada bilər. O, həm də güclü antioksidantdır və oksidləşdirici stressin zəif yuxu keyfiyyəti ilə əlaqəli olduğu bildirilir.
Maqnezium və melatonini eyni qəbul etdikdə nə baş verir?
Maqnezium və melatonin birlikdə beyini və bədəni yuxuya hazırlayaraq sinerji təsir göstərir.
Onlar eyni zamanda həyəcan və yorğunluq hissini azalda bilər. Gecələr yorğun olub, amma rahatlaşa bilmirsinizsə, maqnezium və melatonini birlikdə qəbul etmək kömək edə bilər. Hər iki maddə GABA (qamma-aminoyağ turşusu) neyromediatoruna təsir edir və beyni “aktiv rejimdən” “sakit rejimə” keçirir.
Daha tez yuxuya gedə bilərsiniz
Araşdırmalardan biri göstərib ki, maqnezium, melatonin və B qrupu vitaminlərinin kompleks şəkildə bir ay ərzində qəbul edilməsi yuxusuzluğu azaldır. Digər tədqiqat isə 4 mq melatoninin yatmazdan 3 saat əvvəl qəbulunun yuxuya getmə müddətini qısaltdığını və ümumi yuxu müddətini artırdığını göstərib.
Yuxunun keyfiyyəti yaxşılaşa bilər
Bir araşdırmada 1,9 mq melatonin və 200 mq maqnezium qəbul edən böyüklərdə yuxu səmərəliliyi, yuxuya getmə vaxtı və ümumi yuxu müddətində yaxşılaşma müşahidə olunub. Həmçinin qəzəb və düşmənçilik hisslərinin azalması, eləcə də kalori və yağ kütləsinin azalması qeydə alınıb.
Stress səviyyəsini azalda bilər
Tədqiqatlara görə, oksidləşdirici stress yuxu keyfiyyətinin pisləşməsinə səbəb ola bilər. Maqnezium və melatonin birlikdə hormonal və hüceyrə səviyyəsində təsir göstərərək stressi azaldır və rahatlama yaradır.
Maqnezium və melatoninin birlikdə qəbulu ilə bağlı tövsiyələr
Bu əlavələrin eyni vaxtda qəbulu əksər böyüklər üçün ümumilikdə təhlükəsiz sayılır. Lakin hamilə və süd verən qadınlar, xroniki böyrək xəstəliyi olanlar və ya qan durulaşdırıcı dərman qəbul edənlər ehtiyatlı olmalı və ya onlardan istifadə etməməlidir.
Həmçinin nəzərə almaq lazımdır ki, reseptsiz əlavələr tamamilə risksiz deyil. Melatonin ertəsi gün yuxululuq, başgicəllənmə, baş ağrısı və ya canlı yuxular yarada bilər. Maqnezium isə xüsusilə yüksək dozada ishal, ürəkbulanma və qarın spazmları törədə bilər.
Samir
