Yel Universiteti Tibb Məktəbinin damar cərrahı Britt Tonnessen bildirib ki, insan orqanizmində iki əsas drenaj sistemi var: venalar (qanı ayaqlardan ürəyə qaytarır) və limfa damarları (bədəndə mayelərin hərəkətini təmin edir).

HİT.az xəbər verir ki, o, bu barədə “Prevention” nəşrinə açıqlamasında danışıb.

“Bu iki sistem birlikdə ayaqlardan mayenin çıxarılmasını təmin edir. Lakin maye orada yığıldıqda buna ödem deyilir”, deyə Tonnessen izah edib.

Tibb elmləri doktoru, podoloq Tek Fis isə qeyd edib ki, əksər hallarda ayaq şişməsi əslində ayaqların öz problemindən qaynaqlanmır.

Onun sözlərinə görə, mümkün səbəblər arasında damar problemləri, uzun müddət oturmaq, hamiləlik, böyrək xəstəlikləri və infeksiyalar var.

Hərəkətsiz həyat tərzi və ya uzun müddət ayaq üstə qalmaq

Həkimlər şişkinlik və sızıldayan ağrı olduqda axşamlar ayaqların altına yastıq qoymağı tövsiyə edirlər. Bu, mayenin geri axınına kömək edir.

Tonnessen həmçinin kompressiya corablarının istifadəsini faydalı hesab edir:

“Onlar ayaq və dizə qədər sıx oturaraq mayenin yığılmasının qarşısını alır”.

Həddindən artıq duz istifadəsi

Natriumun çox qəbulu bədəndə suyun saxlanmasına səbəb olur və ödem yaradır. Buna görə həkimlər duz qəbuluna diqqət etməyi tövsiyə edirlər.

Travmalar

Sınıq və ya tendonitdən sonra şişkinlik yarana bilər. Adətən bu halda ağrı da müşahidə olunur. Bu, sağalma prosesinin bir hissəsidir və belə vəziyyətdə ayağa yük verməmək və iltihabəleyhinə dərmanlar istifadə etmək tövsiyə olunur.

Hamiləlik

Hamiləlik zamanı bədəndə maye toplanması artır. Böyüyən uşaqlıq damarları sıxır və ayaqlarda təzyiqi yüksəldir. Hormonal dəyişikliklər də təsir göstərir.

Yüngül şişkinlik normal hesab olunur və fiziki aktivlik, kifayət qədər su qəbulu və rahat ayaqqabı ilə azaldıla bilər.

Menstruasiya

Hormonal dəyişikliklər menstruasiyadan əvvəl də maye yığılmasına səbəb ola bilər. Həkimlər bu dövrdə idman, su qəbulu və duzun azaldılmasını tövsiyə edirlər.

Artıq çəki

Çəki artımı ayaqlarda şişkinliyi gücləndirə bilər. Uzun müddət oturmaq limfa axınını zəiflədir. Kiçik çəki itkisi belə vəziyyəti yaxşılaşdıra bilər.

Samir