Mütəxəssislər smartfonun şarj cihazının dəyişdirilməli olduğunu göstərən dörd əsas əlaməti açıqlayıb. Bu simptomlara məhəl qoymamaq telefonun yavaş şarj olmasına, cihazın zədələnməsinə və hətta yanğına səbəb ola bilər.

HİT.az xəbər verir ki, istifadəçilərin əksəriyyəti şarj cihazını yalnız tamamilə işləmədikdən sonra dəyişir. Lakin ekspertlər bildirirlər ki, nasaz adapter və ya kabel adətən sıradan çıxmazdan xeyli əvvəl xəbərdarlıq əlamətləri göstərir. Bu barədə "BGR" məlumat yayıb.

Kabeldə və ya adapterdə görünən zədələr

Şarj cihazını dəyişmək üçün ən açıq səbəb onun xarici görünüşündəki qüsurlardır. Kabeldə çatlar, aşınmalar, açıq qalmış naqillər yaranıbsa və ya konnektor əyilibsə, belə aksesuardan istifadə təhlükəli ola bilər.

Şarj zamanı qığılcım, tüstü və ya yanıq qoxusunun yaranması da ciddi xəbərdarlıq əlamətidir. Bu hallardan hər hansı biri baş verərsə, cihaz dərhal elektrik şəbəkəsindən ayrılmalı və bir daha istifadə edilməməlidir, çünki yanğın riski mövcuddur.

Smartfon fasilələrlə şarj olunur

Şarj cihazının hələ işləməsi onun tam sağlam olduğu anlamına gəlmir. Xüsusilə cihaz bir-iki ildən çox istifadə olunubsa, onun nə dərəcədə effektiv işlədiyinə diqqət yetirmək lazımdır.

Məsələn, smartfon bəzən normal şarj ola, bəzən isə heç bir səbəb olmadan proses dayana bilər. Digər narahatedici əlamət isə əvvəlki eyni kabel və adapterdən istifadə edilməsinə baxmayaraq şarj prosesinin daha uzun çəkməsidir. Belə nasazlıqlar zaman keçdikcə daha da dərinləşir və şarj cihazının dəyişdirilməsini gecikdirmək məsləhət görülmür.

Şarj cihazı həddindən artıq qızır

İşləmə zamanı adapterin bir qədər isinməsi normal hesab olunur. Lakin onun korpusu əllə tutmaq mümkün olmayacaq qədər qızırsa, bu, diqqət yetirilməli vəziyyətdir.

Həddindən artıq qızma daxili komponentlərin və ya naqillərin zədələnməsindən xəbər verə bilər. Belə şarj cihazı yalnız smartfonun batareyasını sıradan çıxara bilməz, həm də qısaqapanmaya və yanğına səbəb ola bilər.

Kabel konnektorda möhkəm dayanmır

Əgər şarj kabeli daim smartfondan çıxırsa, müəyyən vəziyyətdə saxlamaq və ya ştekeri əllə tutmaq lazım gəlirsə, bu problemi nəzərə almamaq olmaz.

Konnektoru zorla yerinə salmağa çalışmaq telefonun şarj girişini zədələyə bilər. Onun təmiri isə keyfiyyətli yeni şarj cihazı almaqdan daha baha başa gələ bilər.

Ekspertlər yeni aksesuar seçərkən qənaət etməməyi də tövsiyə edirlər. Etibarlı istehsalçıların sertifikatlaşdırılmış şarj cihazları adətən daha uzun müddət xidmət edir, enerjinin sabit ötürülməsini təmin edir və smartfonu gərginlik dəyişikliklərindən daha yaxşı qoruyur.

Samir