Avropa İttifaqı gürcü müxalifətini maliyyələşdirməsinin səbəbini izah etməlidir. 

Hit.az xəbər verir ki, bunu Gürcüstan parlamentinin sədri Şalva Papuaşvili deyib. 

Onun sözlərinə görə, Almaniya, Fransa və digər Avropa ölkələrindən vergi ödəyicilərinin vəsaitləri gizli şəkildə respublikadakı müxalif siyasi partiyalara və radikal qruplara yönəldilir.

“Aİ bir namizəd ölkədəki siyasi partiyaları və radikal qrupları Avropa Demokratiya Fondu vasitəsilə gizli şəkildə maliyyələşdirirsə, bu hansı standartlardır? Bu, qalmaqaldır. İndi bu fond Gürcüstan məhkəmələri tərəfindən polisə hücum edən və parlamentə basqın edənlərə qarşı qoyulan cərimələri ödəyir”, deyə Papuaşvili bildirib.

O əlavə edib ki, Aİ-nin özü indi xarici təsirlərə qarşı direktiv qəbul edir, ona görə də bu qanun çərçivəsində Gürcüstanın tənqidi “farizaizm”dir.

Mayın 14-də Gürcüstan parlamenti yerli cəmiyyətdə mübahisəli olan “Xarici təsirin şəffaflığı haqqında” qanunu üçüncü oxunuşda qəbul edib. Müzakirə hakim “Gürcü Arzusu” partiyasının deputatları ilə müxalifət arasında etirazlar və davalar fonunda baş tutub. Nəticədə 84 deputat lehinə, 30 deputat əleyhinə səs verib.

Bundan sonra Gürcüstan parlamenti qırmızı həyəcan səviyyəsi elan edib. Azadlıq meydanında xüsusi təyinatlılar və su şırnaqları düzülüb, deputatlar polisin mühafizəsi altında binanı tərk ediblər.

Qəbul edilmiş qanuna əsasən, gəlirlərinin 20 faizindən çoxu xaricdən gələn bütün qeyri-kommersiya hüquqi şəxsləri və KİV-lər xüsusi dövlət reyestrində qeydiyyatdan keçməlidirlər. Bundan əlavə, belə QHT və KİV-lərdən hər il Gürcüstan Maliyyə Nazirliyinə gəlir və xərclər haqqında deklarasiya təqdim etmələri tələb olunacaq.

Mayın 18-də Gürcüstan lideri Salome Zurabişvili "xarici agentlər haqqında" qəbul edilmiş qanunu imzalamaqdan imtina edib. Onun sözlərinə görə, bu sənəd Gürcüstanın Avropa yoluna maneədir. Bununla belə, parlament səs çoxluğu ilə vetonu ləğv edə bilər.

Samir