Ukrayna müharibəsinin təcrübəsi Qərb hərbi dairələrinə göstərib ki, uzunmüddətli münaqişələr tank və zirehli texnika ehtiyatlarını sürətlə tükəndirə bilər və döyüş robotları gələcəkdə daha böyük əhəmiyyət daşıya bilər. 

HİT.az xəbər verir ki, bu barədə Ukraynanın "DevDroid" şirkətinin tədqiqat və inkişaf direktoru Oleq Fedorışin “Business Insider”ə açıqlamasında bildirib.

Nəşrin yazdığına görə, uzun və bahalı müharibələrdə döyüş, logistika və digər tapşırıqlar üçün böyük həcmdə texnika tələb olunur. Bu isə tanklar kimi baha sistemlərin səmərəliliyini azalda bilər. Ukrayna müharibəsi göstərib ki, daha ucuz və tez əvəz oluna bilən sistemlərə ehtiyac artır.

“Ukraynanın əlində çoxlu ucuz silah var. Bir çox dron hədəfə çatmır və ya ciddi təsir göstərmir, amma onların kütləvi istifadəsi daha bahalı sistemləri məhv etməyə imkan verir. Yüksək itkilər gözlənilir və bu, qəbul ediləndir, çünki bu sistemlər ucuzdur və tez əvəz olunur”, deyə məqalədə qeyd olunur.

Tankları nə əvəz edə bilər?

Müharibə göstərib ki, tanklar və digər zirehli texnika artilleriya və ucuz dronlar tərəfindən asanlıqla məhv edilə bilər. Bir neçə yüz dollarlıq dronlar milyonlarla dollar dəyərində tankları sıradan çıxarıb. Tanklar yeni müdafiə vasitələri və taktikalarla uyğunlaşsa da, yenə də risk zonasında qalır.

Yerüstü robotlar tankların tam əvəzi deyil və Qərb orduları onları tamamilə əvəz etməyə tələsmir. Tanklar çətin relyefi keçmək, ağır yükləri daşımaq və genişmiqyaslı hücumlar həyata keçirmək baxımından üstünlüyə malikdir.

Bununla belə, robot sistemlər müəyyən funksiyaları öz üzərinə götürə bilər və insan itkisini azalda bilər. Onlar partlayıcı qurğularla və ya pulemyot və qumbaraatan kimi silahlarla hücumlar həyata keçirə, həmçinin cəbhəyə təchizat çatdıra bilirlər.

Ukrayna artıq yerüstü robotların istifadəsini genişləndirir. Fedorışinin sözlərinə görə, onun şirkəti robotları cəbhə xəttində olan komandalar vasitəsilə tez təmir və modernləşdirmə imkanı əldə edir. Bu, hətta zədələnmiş sistemlərin eyni gün bərpasına imkan verir.

Dronların müharibədə rolu artır

Xatırladaq ki, son dövrlərdə yerüstü pilotsuz sistemlərin daha çox avtonom işlədiyi və hətta piyada əsgərləri əvəz etdiyi barədə məlumatlar artır. Hətta yalnız dronlar və yerüstü pilotsuz texnikalarla uğurlu hücum əməliyyatının həyata keçirildiyi ilk hal da qeydə alınıb.

Gələcəkdə Müdafiə naziri Mixail Fedorovun fikrincə, cəbhə logistikasının 100 faizi bu tip sistemlər tərəfindən həyata keçirilə bilər. Onun sözlərinə görə, mart ayında yerüstü robotlar 9 min tapşırıq icra edib.

Samir