Ev sahibləri tez-tez evlərinin cinayətkarların nəzarəti altında olub-olmadığını necə anlamaq mümkün olduğunu soruşurlar. 

HİT.az xəbər verir ki, doğrudan da, cinayətkarlar çox vaxt hədəf seçdikləri obyekti əvvəlcədən öyrənir və bunun üçün müxtəlif müşahidə üsullarından istifadə edirlər. Bu, onların evdəki insanların nə vaxt gəlib-getdiyini və mənzilin nə qədər boş qaldığını müəyyən etməsinə kömək edir.

Mənzilin qarət olunmaq istəndiyini necə anlamaq olar? – ilkin əlamətlər

“Reolink” şirkətinin ekspertlərinə görə, oğrular işarə qoymazdan əvvəl adətən mənzili müşahidə edir, sakinlərin gündəlik rejimini və ətraf mühiti öyrənirlər. Bu davranışlar ilk baxışda təsadüfi görünə bilər, lakin təkrarlanırsa, bu artıq siqnal ola bilər.

Məsələn, eyni avtomobilin dəfələrlə binanın yanında görünməsi və ya ərazidən yavaş-yavaş keçməsi diqqət çəkə bilər. Bu yolla cinayətkarlar ev sahiblərinin işə gedib-gəlmə vaxtlarını və evin boş qaldığı müddəti müəyyən etməyə çalışırlar.

Digər şübhəli əlamət eyni şəxslərin dəfələrlə binanın ətrafında görünməsidir. Əgər kimsə tez-tez girişin yanında dayanır, pəncərələrə baxır və ya telefonla danışırmış kimi davranırsa, bu müşahidə məqsədli ola bilər.

Xüsusilə şübhəli hallardan biri də tanımadığınız şəxslərin müxtəlif bəhanələrlə qapını döyməsidir. Özünü kommunal xidmət işçisi, “sosioloq”, satıcı və ya servis nümayəndəsi kimi təqdim edən şəxslər sakinlərin evdə olma qrafiki və təhlükəsizlik sistemləri barədə məlumat toplamağa çalışa bilər.

Bəzən cinayətkarlar evə daxil olmaq üçün su istəmək və ya tualetdən istifadə etmək bəhanəsi ilə içərini görməyə cəhd edirlər. Eyni üsulu saxta kuryerlər və ya xidmət işçiləri də istifadə edə bilər.

Mənzilin izlənildiyini necə anlamaq olar? – sonrakı mərhələ

Müşahidənin növbəti mərhələlərində fəaliyyət daha məqsədyönlü olur və zəif nöqtələrin müəyyən edilməsinə yönəlir.

Bunun əlamətlərindən biri binanın fasadının, girişlərin və ətraf ərazinin çəkilməsidir. Telefonla danışır kimi edərək kamera ilə çəkiliş aparmaq da cinayətkarların istifadə etdiyi üsullardandır.

Həmçinin oğruların mənzilləri necə işarələdiyi də məlumdur: qapı menteşələrinə sikkə qoymaq və ya qapı aralığına reklam vərəqələri yerləşdirmək kimi üsullar istifadə olunur. Sakinlər qapını açıb-bağladıqda bu əşyalar yerini dəyişir və ya düşür.

Digər xəbərdarlıq əlamətləri arasında qapının dəfələrlə döyülməsi və cavabsız qalması, eləcə də kiliddə və qapı mexanizmində müdaxilə izlərinin olması yer alır.

Bəzi hallarda müşahidə üçün dronlardan da istifadə oluna bilər. Bu, ərazini yuxarıdan izləməyə, girişləri, işıqlandırmanı, kameraları və “kor zonaları” müəyyən etməyə imkan verir.

Qeyd olunur ki, bu əlamətlərin hər biri təkbaşına təhlükənin dəqiq göstəricisi deyil. Lakin onların birlikdə və təkrarlanan şəkildə müşahidə olunması evin əvvəlcədən öyrənildiyini göstərə bilər və təhlükəsizliyə daha ciddi yanaşma tələb edir.

Samir