Rusiya Avropada sabotaj və digər hücumların həyata keçirilməsi üçün ayrı-ayrı şəxslərin cəlb olunmasından “peşəkar” şəbəkələrin formalaşdırılmasına keçir. Bu barədə Polşanın Daxili Təhlükəsizlik Xidmətinin hesabatında deyilir.

HİT.az xəbər verir ki, məlumatı "The Independent" yayıb.

Hesabata əsasən, Rusiya hazırda birdəfəlik və ucuz cəlb olunan agentlərdən imtina edərək daha “peşəkar” əməliyyatlara üstünlük verir və mütəşəkkil cinayətkarlıq şəbəkələrini prosesə cəlb edir.

Xidmətin məlumatına görə, son iki il ərzində Polşa son 30 ildə olduğundan daha çox casusluq araşdırması aparıb və 62 nəfər həbs edilib.

“Bu casusluq fəaliyyətləri Rusiyanın Qərb dünyasına qarşı elan olunmamış müharibəsinin bir hissəsidir, burada Rusiya kəşfiyyatı getdikcə xüsusi təyinatlı qüvvələrə (kəşfiyyat və diversiya) xas metodlardan istifadə edir”, deyə hesabatda qeyd olunub.

Xidmətdə vurğulanıb ki, 2024–2025-ci illərdə 1991–2023-cü illər üzrə ümumi göstəriciyə bərabər olan 69 casusluq araşdırması başlanıb.

“Rusiya Federasiyasının uzunmüddətli məqsədi Avroatlantik strukturların dağılması, ayrı-ayrı ölkələrin təcrid olunması və onların daxili sosial-siyasi və iqtisadi destabilizasiyası olaraq qalır”, deyə hesabatda bildirilir.

Qeyd olunur ki, əsas diqqət Polşaya yönəlsə də, bəzi casus fəaliyyəti Belarus xüsusi xidmət orqanlarının da iştirakı ilə həyata keçirilib və bu qurumlar Moskva ilə sıx əməkdaşlıq edir, həmçinin Çin də bu proseslərdə qeyd olunur.

Hesabatda bildirilir ki, 2024–2025-ci illərdə Rusiya “qapalı mütəşəkkil cinayətkarlıq strukturlarına” əsaslanaraq “mürəkkəb diversiya hüceyrələri”nin yaradılmasına daha çox üstünlük verib.

“Rusiya tərəfi hüquq-mühafizə orqanlarında təcrübəsi olan şəxslərə (məsələn, keçmiş hərbçilər, polis əməkdaşları, “Vaqner qrupu”ndan muzdlular) üstünlük verir”, deyə məlumatda qeyd olunub.

Eyni zamanda, Rusiya xidmətləri ölkə daxilində keçirilən hazırlıq proqramlarını aktivləşdirib və bu proqramlar agentlərin “terror fəaliyyətinə peşəkar hazırlanmasına” yönəlib.

Samir