Son illərdə bir çox Avropa ölkələrində qeyri-adi yol nişanlanması kimi qoşa kəsik mərkəz xətti müşahidə olunur. İlk baxışda bir çox sürücü üçün anlaşılmaz görünən bu işarələmə yol hərəkətinin təhlükəsizliyinin artırılmasında mühüm rol oynayır. 

HİT.az xəbər verir ki, bu barədə "Blikk" yazır.

Avtomobil məktəblərində sürücülərə bütöv xəttin keçilməsinin qadağan olduğu, kəsik xəttdə isə şərait uyğun olduqda ötmənin mümkün olduğu öyrədilir. Lakin yolun ortasında iki paralel kəsik xətt olduqda nə etməli olduğu sualı yaranır.

ADAC (Almaniyanın ümumi avtomobil klubu) eksperti Aleksandr Şnaarsın izahına görə, qoşa kəsik xətt avtomatik olaraq ötmə qadağası demək deyil. Qayda adi kəsik mərkəz xətti ilə eynidir: görünüş və yol şəraiti təhlükəsizdirsə, ötməyə icazə verilir.

Ekspertin sözlərinə görə, bu cür işarələmənin məqsədi fərqlidir. Belə yollarda tez-tez yol hərəkəti müvəqqəti olaraq üç zolağa bölünəcək şəkildə yenidən təşkil edilir. Bu isə eyni istiqamətdə hərəkət edən nəqliyyat vasitələrinin daha təhlükəsiz şəkildə ötməsinə imkan yaradır.

Mütəxəssis hesab edir ki, qoşa kəsik xətt sürücüləri qarşıda yol zolaqlarının xüsusi şəkildə bölündüyü və daha yüksək diqqət tələb edən bir sahə olduğuna dair xəbərdar edir.

Araşdırmalara əsasən, bu cür yol hissələri xüsusilə intensiv hərəkət olan magistral yollarda üzbəüz toqquşmaların sayını azalda bilər. Beləliklə, qoşa kəsik xətt təsadüfi tətbiq edilmir və məqsədi yol hərəkəti qaydalarındakı dəyişiklikləri daha aydın şəkildə göstərməkdir. Xarici ölkələrdə, xüsusilə Almaniya və Skandinaviya ölkələrində bu cür işarələmə ilə daha çox rastlaşmaq mümkündür.

Eyni zamanda sürücülər diqqətli olmalıdır, çünki qoşa kəsik xətt asanlıqla qarışıq işarələməyə keçə bilər. Belə halda bir tərəfdə kəsik xətt, digər tərəfdə isə bütöv xətt olur.

Bu isə o deməkdir ki, bütöv xəttin olduğu tərəfdə ötmə və xəttin keçilməsi qadağandır, digər tərəfdə isə ötmə icazəli qala bilər. Belə hallardan adətən pis görünüşlü döngələrdə və ya daha təhlükəli yol hissələrində istifadə olunur, burada ötmə yalnız bir istiqamətdə təhlükəsiz hesab edilir.

Əvvəllər mütəxəssislər avtomatik sürətlər qutusunda "D/S" işarəsinin mənasını da izah etmişdilər. Bu hərflər Drive və Sport mənalarını daşıyır, lakin onların real iş prinsipi markadan markaya ciddi şəkildə fərqlənir.

Həmçinin mexaniki sürətlər qutusunda "D" hərfinin əslində nəyi ifadə etdiyi də açıqlanmışdı. Avtomatik qutularda "D" irəli hərəkəti göstərsə də, mexaniki transmissiyada bu işarə daha texniki məna daşıyır.

Samir