Avropa getdikcə daha açıq şəkildə Donald Trampa qarşı mövqe sərgiləyir və Ukraynadan Qrenlandiyaya qədər öz maraqlarını müdafiə etməyə çalışır.
HİT.az xəbər verir ki, "The Guardian"ın yazdığına görə, Almaniya kansleri Fridrix Mersin ABŞ prezidentini tənqid etməsi tək hal deyil.
Məqalədə qeyd olunur ki, bu cür ritorika Vaşinqtonun Avropadakı təsirinin zəiflədiyini dərk etməklə bağlıdır.
Hazırda Emmanuel Makron, Kir Starmer və Corcia Meloni daxil olmaqla bir sıra Avropa liderləri daha açıq siyasi qarşıdurma nümayiş etdirirlər. Mersin ABŞ-nin İranla bağlı real strategiyaya malik olmadığı barədə açıqlaması və Tehranın diplomatik addımlarının Vaşinqtonu “çətin vəziyyətə salması” kimi qiymətləndirməsi buna nümunə göstərilir.
Məqalədə gərginliyin ABŞ-nin Qrenlandiyanı alma cəhdləri və Macarıstan daxil olmaqla bəzi Avropa ölkələrinin daxili siyasi proseslərinə təsir iddiaları ilə daha da artdığı vurğulanır.
Xüsusilə təhlükəsizlik sahəsində dəyişikliklər diqqət çəkir. ABŞ Avropanın əsas silah təchizatçısı olaraq qalsa da, SIPRI məlumatına görə, ABŞ silahlarının Avropa bazarındakı payı 58%-ə enib.
Ukraynanın maliyyələşdirilməsi də bu dəyişimin göstəricisi kimi təqdim olunur. Bildirilir ki, 2025-ci ilin martından etibarən ABŞ Ukraynaya birbaşa maliyyə yardımını dayandırıb və yük daha çox Avropa İttifaqının üzərinə düşüb.
Hazırda Ukraynanın ehtiyaclarının 20%-i Avropa istehsalı, 60%-i isə yerli istehsal hesabına ödənilir.
“ABŞ-dən daha az asılı olan Ukrayna, ABŞ-dən daha az asılı olan Avropa deməkdir”, deyə müəllif qeyd edir.
Məqaləyə görə, Brüssel həmçinin mümkün ticarət müharibələrinə cavab olaraq genişmiqyaslı tədbirlər hazırlayır. Aİ ölkələri ABŞ ixracatına qarşı 93 milyard avro dəyərində əks tədbirləri təsdiqləyib.
Jurnalistlər yazır ki, Avropa hökumətləri Trampın bir çox təhdidlərinin tam həyata keçmədiyini anlayır və ABŞ daxilində – Konqres, məhkəmələr və hətta siyasi koalisiyada – müqavimətin artdığını görür.
Keçmişdə də bildirilib ki, ABŞ-nin qlobal imici pisləşir və hətta bəzi indekslərdə Rusiya səviyyəsinə yaxınlaşır.
Həmçinin qeyd olunur ki, ABŞ qoşunlarının Almaniyadan çıxarılması Avropanın İran məsələsində Vaşinqtonun gözləntilərinə uyğun davranmasına səbəb olmayıb. Əksinə, Avropa ölkələri daha çox öz təhlükəsizlik strategiyalarını gücləndirməyə yönəlib.
Samir
