Fransanın cənub-qərbində təxminən 72 milyon il yaşı olan, Təbaşir dövrünə aid 100-dən çox dinozavr yumurtası aşkar edilib. 

HİT.az xəbər verir ki, bu barədə “Antena 3 CNN” məlumat yayıb.

Məlumata görə, bu yumurtaların yalnız təxminən 5 faizi zədəsiz qalıb, digərləri isə artıq çatlamış və ya içindən balalar çıxdığı üçün embrion saxlamır. Bu səbəbdən onların dəqiq növünü müəyyənləşdirmək çətin olsa da, alimlər onların titanozavrlar qrupuna aid sauropodlara məxsus olduğunu düşünürlər.

Nəşr qeyd edir ki, futbol topu böyüklüyündə olan bu yumurtalardan uzunluğu 40 metrə, çəkisi isə 90 tona çata bilən nəhəng ot yeyən dinozavrlar çıxıb.

“Əvvəlcə yalnız ağac köklərindən qurulmuş dağılmış bir yuva tapdıq. Lakin bir az daha dərin qazdıqdan sonra yumurta sıralarını aşkar etdik”, deyə fransalı paleontoloq Alan Kabut bildirib.

Tədqiqatlara 2025-ci ilin oktyabrında başlanılıb, lakin alimlər yerin altında hələ də çoxsaylı tapıntıların ola biləcəyini istisna etmirlər.

“Bu, fövqəladə bir yataqdır və onun tam öyrənilməsi üçün nəsillər boyu paleontoloqların işi lazım olacaq”, deyə alim əlavə edib.

Mütəxəssislərin fikrincə, bu cür tapıntı dinozavrların hər il eyni yerlərə qayıdaraq yumurta qoyması ilə izah olunur. Meze parkında aparılan tədqiqatlar göstərib ki, dinozavr populyasiyaları asteroidin 66 milyon il əvvəl baş verən toqquşmasından xeyli əvvəl, milyon illər ərzində azalmaqda idi.

Samir