2014–2019-cu illərdə Ukraynanın xarici işlər naziri olmuş Pavlo Klimkin ABŞ Prezidenti Donald Trampdan sonra Rusiya lideri Vladimir Putinin Çinə səfərinin təsadüfi olmadığını bildirib. 

HİT.az xəbər verir ki, o, bu barədə Radio NV-yə müsahibəsində danışıb.

“Çində heç nə təsadüfi deyil. Bir böyük Çin filosofu demişdi ki, cümlələr və sözlər yoxdur, yalnız simvollar və işarələr var. Çin simvolizmə çox diqqət yetirir, həm daxildə, həm də dünyada onun addımlarının necə qəbul edildiyini ciddi şəkildə nəzərə alır. Məncə, bu, çox dəqiq planlaşdırılıb”, deyə Klimkin bildirib.

Diplomatın fikrincə, Çinin 9 May münasibətilə Moskvaya nümayəndə heyəti göndərməməsi və orada yalnız səfirlik səviyyəsində təmsil olunması da çox şeydən xəbər verir.

Klimkin bildirib ki, həm Tramp, həm də digər tərəflər Ukrayna ətrafındakı vəziyyəti müzakirə ediblər və bunu Trampın özü də təsdiqləyib.

“Trampın ciddi arqumentləri var, baxmayaraq ki, onu İrandakı hadisələr fonunda zəiflətməyə çalışırlar. Bu məsələlər həm təhlükəsizlik, həm süni intellektin inkişafı, həm də çip kimi qabaqcıl texnologiyalara ixrac məhdudiyyətləri ilə bağlıdır”, deyə o qeyd edib.

Onun sözlərinə görə, qərarlar siyasi xarakter daşıyacaq və ABŞ Tayvan məsələsində də mövqeyini nəzərdən keçirə bilər:

“Eşitdiklərimə görə, Tayvan ətrafında 50/50 qərar ehtimalı var. Bu o deməkdir ki, ABŞ-ın siyasi mövqeyi dəyişməyəcək, amma Çin öhdəliklərini yerinə yetirsə, silah tədarükü müəyyən qədər yavaşladıla bilər. Hansı razılaşmalar olduğunu isə bilmirik".

O əlavə edib ki, Çin Avropa ilə həm ticarət, həm də siyasi münasibətlərini balanslaşdırmağa çalışır və bu, həm Trampın, həm də Putinin nəzərindədir.

“Çinin İran və Ukrayna ilə bağlı siyasətinin nə dərəcədə üst-üstə düşdüyünü demək çətindir. Bu, yaxın həftə və aylarda baş verəcək hadisələrdən asılı olacaq”, deyə diplomat yekunlaşdırıb.

Samir