ABŞ Ukraynaya Belarusdan kalium gübrələrinin idxalına dair məhdudiyyətləri yumşaltmaq üçün təzyiq göstərir və eyni addımı Avropa ölkələrinə də qəbul etdirməyə çalışır. 

HİT.az xəbər verir ki, bu barədə "Bloomberg" mənbələrə istinadən yazıb.

Kalium torpağın məhsuldarlığını artırmaq üçün istifadə olunan əsas qida maddəsidir. Sanksiyalardan əvvəl gübrələr Belarus iqtisadiyyatının əsas valyuta gəlirlərindən biri olub. Lakin Qərb ölkələri Minskə qarşı siyasi repressiyalar və Rusiyanın Ukraynaya qarşı müharibəsini dəstəklədiyi üçün məhdudiyyətlər tətbiq edib.

Vaşinqtonun mövqeyinə görə, bu məhdudiyyətlərin yumşaldılması Belarusla Rusiya arasında müəyyən məsafə yarada və Minsk ilə münasibətləri yaxşılaşdıra bilər.

Bu ilin əvvəlində ABŞ artıq Belarus gübrələrinə dair bəzi sanksiyaları yumşaldıb. Bu addımın bir hissəsi kimi, Minsk yüzlərlə siyasi məhbusu azad edib. ABŞ administrasiyası Belarus prezidenti Aleksandr Lukaşenko ilə münasibətləri yumşaltmağa çalışır.

Lakin Avropa sanksiyaları qalmaqda davam etdiyi üçün Belarus ənənəvi ixrac marşrutlarından — Baltik dənizi limanlarından istifadə edə bilmir və Rusiya limanları və dəmir yollarından asılı qalır.

Litva və region ölkələri ABŞ-dan gələn təzyiqləri hiss etdiklərini bildirib. Lakin rəsmi Vilnüs tranzit məhdudiyyətlərinin ləğvinin nəzərdə tutulmadığını və bunun milli təhlükəsizlik və Aİ sanksiyaları ilə ziddiyyət təşkil etdiyini vurğulayıb.

Minsk isə 2021-ci ildən sonra ixracı Rusiya vasitəsilə yönləndirib, bu da Belarusun Moskva asılılığını artırıb.

Hazırda Avropa İttifaqının sanksiyaları yumşaltmaq niyyətində olduğuna dair heç bir siqnal yoxdur. Eyni zamanda Belarusun Rusiya ilə birgə qeyri-planlaşdırılmış nüvə təlimləri keçirdiyi bildirilir.

Məlumata görə, ABŞ son aylarda Belarus banklarına və “Belaruskali” şirkətinə qarşı bəzi məhdudiyyətləri qismən ləğv edib. Eyni zamanda Rusiya neftinin daşınmasına dair bəzi lisenziyalar da uzadılıb.

Samir