Əgər evə dördayaqlı dost gətirməyi planlaşdırırsınızsa, cins seçiminə ciddi yanaşmaq vacibdir. Çünki hər it kiçik uşaqlar üçün uyğun olmur. 

HİT.az xəbər verir ki, "SprucePets" nəşrinin məlumatına görə, bəzi cinslər ya həddindən artıq iri və hərəkətli olur, ya da sərhədləri pozulduqda aqressiv reaksiya verə bilir.

Mütəxəssislər kiçik uşaqlı ailələr üçün daha riskli hesab edilən 12 it cinsini açıqlayıblar.

Veymaraner

Bu itlər ov üçün yetişdirildiyi üçün çox yüksək enerjiyə malikdirlər. Kobud və həddindən artıq aktiv oyunlara meylli olduqları üçün kiçik uşaqlar üçün təhlükə yarada bilirlər. Həm də ciddi fiziki aktivlik tələb edirlər.

Çihuahua

Kiçik ölçüsünə görə uşaqlar üçün ideal hesab edilsə də, əslində tez-tez yanlış seçim sayılır. Öz sərhədləri pozulduqda hürmə və dişləmə ilə reaksiya verə bilirlər.

Akita

Əsrlər boyu mühafizəçi kimi yetişdirildiyi üçün güclü müdafiə instinkti var. Evə gələn yad insanları təhlükə kimi qəbul edə bilər.

Pekines

Stressə qarşı dözümsüz və tez əsəbiləşən itlərdir. Uşaqlar onları narahat etdikdə aqressiv reaksiya göstərə bilərlər.

Sibir haskisi

Çox enerjili və güclü itlərdir. Oyun zamanı təsadüfən uşaqlara zərər verə biləcək qədər fiziki gücə malikdirlər.

Alyaska malamutu

Haskilərə bənzəsələr də daha iri və güclüdürlər. Nəzarət edilməsi çətin ola bilər və kobud oyunlara meyllidirlər.

Şi-tzu

Kiçik ölçülüdürlər, lakin ayaq altında qalaraq evdə risk yarada bilirlər. Bəzi hallarda narahat olduqda əsəbi ola bilirlər.

Avstraliya çoban iti

Sürü instinkti güclü olduğu üçün uşaqları “idarə olunmalı qrup” kimi qəbul edə bilər və onları yüngül dişləmə ilə yönləndirməyə çalışa bilər.

Bulmastif

Çox mehriban olsalar da, ölçülərini düzgün idarə edə bilmirlər. Oyun zamanı kiçik uşaqları asanlıqla yıxa bilərlər.

Çau-çau

Sakit görünüşün arxasında müstəqil və bəzən aqressiv xarakter gizlənir. Yüksək səslərə həssasdırlar.

Rottveyler

Güclü mühafizə instinktinə malikdirlər. Uşaqların səs-küylü oyunlarını bəzən təhlükə kimi qavrayırlar.

Qreyhaund

Sürətli və ov instinkti güclü itlərdir. Eyni zamanda sakit mühiti sevirlər və səs-küylü uşaqlar onlarda stress yarada bilər.

Bu cinslər ümumiyyətlə yanlış sosiallaşma və nəzarətsiz mühitdə uşaqlar üçün risk yarada bilər. Seçim edərkən itin temperamenti, təlimi və ailə mühitinə uyğunluğu mütləq nəzərə alınmalıdır.

Samir