Ukrayna və onun müttəfiqləri Rusiya işğalının zəiflədiyini getdikcə daha çox qəbul edir, çünki Kiyev cəbhə xəttində vəziyyəti sabitləşdirir və Moskvanın yaz hücumunu dayandırır. 

HİT.az xəbər verir ki, bu barədə “Bloomberg” yazır.

Məqalədə qeyd olunur ki, Ukraynanın dronlardan daha effektiv istifadəsi Rusiya qüvvələrinə ciddi itkilər yetirir. Eyni zamanda cəbhə xəttindən kənarda və Rusiya ərazisinin dərinliklərində həyata keçirilən zərbələr Prezident Vladimir Putinə qarşı daxili tənqidi gücləndirir. İqtisadi geriləmə və internet məhdudiyyətləri ilə birlikdə bu vəziyyət Rusiya cəmiyyətində müharibə yorğunluğunu artırır.

“Rusiya elitasının bir çox nümayəndəsi də gərgin əhval-ruhiyyə bölüşür, bəzi yüksək vəzifəli Kreml rəsmiləri isə münaqişənin dalana dirəndiyini və onun həlli üçün aydın yolun olmadığını bildirirlər”, deyə mənbələrə istinadən qeyd edilir.

Məqalədə həmçinin bildirilir ki, Putin bu müharibəni ilin sonunadək başa çatdırmaq istəyir, lakin yalnız “qələbə” kimi təqdim edilə biləcək şərtlərlə. Bu şərtlərə Rusiya ordusunun uzun müddətdir tam ələ keçirə bilmədiyi Donbas üzərində tam nəzarət və Avropanın Rusiya tərəfindən ələ keçirilmiş əraziləri faktiki tanıması daxil ola bilər.

Kreml sözçüsü Dmitri Peskov isə Putinin belə bir vaxt çərçivəsi müəyyən etməsi iddiasını təkzib edib.

“Bloomberg” vurğulayır ki, Ukraynanın geniş miqyasda istifadə etdiyi dronlar müharibədə həlledici amilə çevrilib və Kiyevin canlı qüvvə çatışmazlığını qismən kompensasiya edir.

Bununla belə, Ukrayna hələ də strateji məqsədlərinə tam nail ola bilməyib – işğal olunmuş ərazilərin böyük hissəsini geri qaytarmaq və ABŞ vasitəçiliyi ilə aparılan danışıqlarda irəliləyiş əldə etmək mümkün olmayıb.

Bir sıra Avropa diplomatları isə Rusiyada əhval-ruhiyyənin mənfi olduğunu, cəbhədə vəziyyətin dalana dirəndiyini və Ukrayna dron zərbələrinin müharibəni Moskva daxilinə daşıdığını bildirir.

Böyük Britaniyada Beynəlxalq Strateji Araşdırmalar İnstitutunun Rusiya və Avrasiya üzrə baş elmi işçisi Naycel Quld-Devisin fikrincə, Rusiya cəbhədə uğursuzluqlarla üzləşir və müharibəni davam etdirmək üçün yaxın 12 ay ərzində ikinci qismən səfərbərliyə getmək məcburiyyətində qala bilər.

Ukraynanın müdafiə naziri Mixailo Fedorov isə bildirib ki, cəbhədə irəliləyişin hər kvadrat kilometri Rusiya üçün ən azı 200 itkiyə başa gəlməlidir. Onun sözlərinə görə, Ukrayna hücumları ləngidib və tədricən təşəbbüsü bərpa edir.

Eyni zamanda “Bild” nəşri yazıb ki, Putin müharibəni üç istiqamətdə uduzur: böyük insan itkisi, işğal olunmuş ərazilərə nəzarətin zəifləməsi və müharibənin Rusiya ərazisinə keçməsi.

Samir