Alimlər Marsa göndərilən Perseverance aparatı üçün avadanlıqların hazırlandığı NASA-nın Kennedi Kosmik Mərkəzi və Reaktiv Hərəkət Laboratoriyasının təmiz otaqlarını araşdırıblar. Nəticədə burada 27 müxtəlif göbələk ştammı tapılıb.

Hit.az xəbər verir ki, onların arasında ən yüksək davamlılıq Aspergillus calidoustus növündə qeydə alınıb.

Tədqiqatlar göstərib ki, bu göbələyin sporları kosmosdakı güclü radiasiyaya altı ay ərzində tab gətirə bilir. Bundan əlavə, o, 257 dərəcə Fahrenheit (təxminən 125°C) temperaturda iki saatlıq quru istilik sterilizasiyasından sonra da yaşamağı bacarıb. Bu üsul mühəndislər tərəfindən kosmik hissələrin sterilizasiyası üçün istifadə olunur.

Orqanizm həmçinin aşağı atmosfer təzyiqinə, Marsa xas sərt soyuğa və qida maddələri kasad olan mühitə uyğunlaşma qabiliyyəti göstərib. Sporları tam məhv etmək yalnız ekstremal soyuq və radiasiyanın eyni vaxtda tətbiqi ilə mümkün olub.

Tədqiqatçı Atul M. Çanderin sözlərinə görə, alimlər kosmik aparatların digər planetləri təsadüfən canlı orqanizmlərlə çirkləndirməməsi üçün onların tam steril vəziyyətdə göndərilməsinə çalışırlar.

Hazırda kosmik agentliklərin sterilizasiya protokolları əsasən bakteriyalara yönəlib. Yeni nəticələr isə NASA-nın təmizləmə və təhlükəsizlik qaydalarına yenidən baxmasına səbəb ola bilər.

Samir