Avstraliyanın tropik meşələrində bitən gimpi-gimpi (Dendrocnide moroides) ağacı zahirən adi bitki kimi görünsə də, alimlər onu dünyanın ən təhlükəli bitkilərindən biri hesab edirlər. 

HİT.az xəbər verir ki, bu barədə “Discoverwildlife” yazıb.

Ağacın bütün hissələri — gövdəsi, yarpaqları və meyvələri — mikroskopik tikanlarla örtülüdür. Bu tikanlara toxunduqda dərinin içinə güclü toksin yeridilir və nəticədə uzunmüddətli, dözülməz ağrı yaranır. Ağrı günlərlə, həftələrlə, hətta bəzən illərlə davam edə bilər.

Mənbələrə görə, bu ağacın təsirini ilk sənədləşdirənlərdən biri yol nəzarətçisi A. S. Makmillan olub. O, 1866-cı ildə yazdığı məktubda ağacın təsirinə məruz qalan atının “dəli olduğunu və iki saat ərzində öldüyünü” bildirib.

1963-cü ildə təbiət mühafizə xidmətinin əməkdaşı Erni Rayder bu ağacın budağı ilə üz və bədən nahiyəsindən zədə alıb. Onun sözlərinə görə, ağrı iki il ərzində tam keçməyib və hiss etdiklərini “hər şeydən on dəfə daha güclü” kimi təsvir edib.

Entomoloq Marina Herli bu ağrını “eyni anda həm elektrik cərəyanı vurması, həm də yanma hissi” kimi xarakterizə edib. Bəzi hallarda bu bitki ilə təmas ciddi allergik reaksiyalara da səbəb olub.

2020-ci ildə aparılan tədqiqatlarda Dendrocnide cinsinə aid bitkilərin toksinləri hörümçək və dəniz ilbizlərinin zəhərlərindəki neyrotoksinlərlə müqayisə edilib.

Mütəxəssislər bildirirlər ki, bu ağacın yaxınlığında olmaq belə təhlükəlidir. Hətta havada yayılan mikroskopik tikanların nəfəs yollarına düşməsi tənəffüs problemlərinə səbəb ola bilər.

Samir