Roma Papası XIV Lev İspaniyaya bir neçə gün davam edəcək səfərə başlayır.
HİT.az xəbər verir ki, səfər çərçivəsində o, möminlərlə və siyasətçilərlə görüşəcək, Barselonada demək olar ki, tamamlanmış Müqəddəs Ailə (Sagrada Familia) məbədində mərasim keçirəcək və miqrantların yerləşdirildiyi mərkəzləri ziyarət edəcək. Səfər beynəlxalq mediada geniş rezonans doğurub və onun mühüm siyasi məna daşıdığı vurğulanır.
“El Pais” (Madrid, İspaniya)
Papa Levin Trampa qarşı sərt mövqeyi İspaniyada geniş dəstək qazanıb
Papa XIV Levin ABŞ Prezidenti Donald Trampa qarşı sərt mövqeyi onu qlobal avtoritar sağ cinahın əsas fiqurlarından biri kimi görənlər üçün ziddiyyətli bir liderə çevirib və bu mövqe İspaniya cəmiyyətində də dəstək tapır. Sorğulara görə, respondentlərin təxminən 70 faizi onun münaqişələrin həllində müharibəyə qarşı çıxışını dəstəkləyir. 57,1 faiz isə Tramp administrasiyasının kütləvi deportasiya siyasətini açıq şəkildə tənqid etməsini doğru sayır.
Nəşrin yazdığına görə, Papa XIV Lev “Trampa qarşı müqavimətin dayağı” kimi dəyərləndirilir.
“Neue Zürcher Zeitung” (Sürix, İsveçrə)
Papa XIV Lev İspaniyada artıq daha az katolik olan bir cəmiyyətlə üzləşəcək
Qəzet yazır ki, Papa XIV Lev İspaniyaya səfəri zamanı kilsə, dövlət və cəmiyyət arasındakı münasibətlərin yenidən formalaşdığı bir ölkə ilə qarşılaşacaq. Səfərə böyük maraq olsa da, İspaniyanın əvvəlki qədər dindar olmadığı qeyd edilir. Madrid və Barselonada açıq havada keçiriləcək mərasimlər üçün artıq yarım milyondan çox insan qeydiyyatdan keçib.
Bununla belə, ölkədə özünü praktik katolik hesab edənlərin payı təxminən beşdə birdir. 50 il əvvəl isə Katolik Kilsəsi ölkədə əsas ideoloji güclərdən biri idi və Fransisko Franko dövründə ictimai-mənəvi həyat üzərində ciddi təsirə malik idi.
“The Guardian” (London, Böyük Britaniya)
Papa XIV Levin səfəri Pedro Sançes üçün siyasi fürsət kimi dəyərləndirilir
Nəşrin yazdığına görə, Papa XIV Levin miqrantlara diqqət yönəltməsi onu İspaniyanın Baş naziri Pedro Sançesə yaxınlaşdırıb. Sançesin hökuməti korrupsiya ittihamları ilə üzləşsə də, papanın səfəri ölkədə geniş ictimai diqqət çəkib.
Barselonada və Madriddə papanın şəkilləri plakatlarda, ictimai nəqliyyatda və metro ekranlarında nümayiş etdirilir. Qəzet İspaniyanın hazırda daha kəskin siyasi qütbləşmə dövrü yaşadığını, mənzil böhranı, miqrasiya və korrupsiya iddialarının ictimai gərginliyi artırdığını qeyd edir.
“Associated Press” (Nyu-York, ABŞ)
Katoliklər Papa XIV Levin miqrasiya mərkəzlərinə səfərinin gərginliyi azaldacağını ümid edir
Papa XIV Lev gələn həftə Kanar adalarına, iyulun əvvəlində isə Lampeduzaya səfər etməyi planlaşdırır. Bu ərazilər Afrikadan Avropaya yönələn təhlükəli miqrasiya marşrutlarının əsas nöqtələri hesab olunur və burada hər il on minlərlə miqrant qəbul edilir.
Katolik Kilsəsinin miqrantların hüquqlarının müdafiəsi mövqeyi əvvəlki Papa Fransisk dövründə də prioritet olub. 2013-cü ildə Fransisk Lampeduzaya səfər etmiş, 2016-cı ildə isə Lesbos adasından bir qrup suriyalı qaçqını özü ilə Vatikan gətirmişdi. Papa Lev dövründə də kilsənin miqrantlara humanist yanaşma çağırışlarını davam etdirdiyi bildirilir.
Samir
