İsveçrədə alimlər Roma dövrünə aid, təxminən 1700 illik yaşı olan və uzun illər axtarılan əfsanəvi sualtı körpünü aşkar ediblər. Bu tikilinin İtaliyanı Reyn çayı hövzəsi ilə birləşdirən qədim yolun mühüm hissəsi olduğu ehtimal edilir.
HİT.az xəbər verir ki, isveçrəli dalğıclar “Interesting Engineering” nəşrinin məlumatına görə, Roma dövrünə aid nadir körpünün yerini müəyyən ediblər. Tədqiqatçılar uzun illərdir onun dəqiq yerləşdiyi ərazini müəyyən etməyə çalışırdılar.
Kəşf Aare çayı üzərində, Zoloturn şəhəri yaxınlığında yeni körpünün tikintisinə hazırlıq işləri zamanı aparılan arxeoloji araşdırmalar nəticəsində baş verib. Kanton Arxeologiya İdarəsinin cəlb etdiyi mütəxəssislər bölgədə standart sualtı tədqiqatlar həyata keçiriblər.
Alimlər bu ərazidə qədim dövrdə taxta dirəklərdən ibarət körpü dayaqlarının ola biləcəyini ehtimal edirdilər. Ərazinin strateji mövqeyi və transalp ticarət və hərbi marşrut üzərində yerləşməsi bu ehtimalı daha da gücləndirirdi.
Dalğıclar aparılan sualtı yoxlamalar zamanı Venqi körpüsü yaxınlığında sıra ilə düzülmüş taxta svayları aşkar ediblər. Uzunluğu iki metrdən bir qədər az olan bu dirəklər çay axını istiqamətində yerləşdirilib və körpü dayağının mövcudluğunu ilk dəfə maddi olaraq təsdiqləyib.
Aşkar edilən taxta materialın analizi nəticəsində körpünün eramızın IV əsrinə aid olduğu müəyyən edilib. Tikilinin Roma hərbi-inzibati yaşayış məntəqəsi olan kastellumun inkişafı ilə əlaqəli olduğu bildirilir.
“LBV” məlumatına görə, bu körpü İtaliyanı Reyn çayı ilə birləşdirən mühüm ticarət və hərbi yolun tərkib hissəsi olub. Daha əvvəl çayın hər iki sahilində bu marşrutun hissələri aşkar edilmişdi və bu da alimləri burada mütləq körpünün mövcud olduğu nəticəsinə gətirib çıxarmışdı.
Zoloturn ətrafında aparılan uzunmüddətli araşdırmalar zamanı çay yatağında taxta svayların qorunub saxlanıla biləcəyi ehtimal olunurdu. Aare çayının həmin ərazidə daralması da potensial körpü yerinin müəyyən edilməsinə kömək edib.
Şəhərin qədim latınca adı Salodurum “çay daralması” və ya “dalğaların qapısı” mənasını verir ki, bu da ərazinin strateji əhəmiyyətini təsdiqləyir.
“Arkeonews” nəşrinin yazdığına görə, Roma dövründə bu tip kastellumlar yalnız müdafiə divarları deyil, həm də kompleks hərbi idarəetmə sistemi idi. Zoloturn bölgəsi Roma imperiyasının yol şəbəkəsində mühüm keçid nöqtələrindən biri sayılırdı.
Tədqiqatçılar hesab edirlər ki, bu körpü Roma imperiyasının bölgədə nəzarəti gücləndirmək və mühüm keçid nöqtəsini qorumaq məqsədi ilə inşa edilib.
Hazırda şəhərin müasir barokko mərkəzinin altında Roma dövrünə aid yaşayış izləri də aşkar edilib ki, bu da ərazinin strateji seçim olduğunu göstərir.
Körpünün 1700 illik taxta hissələri havaya çıxarıldıqda sürətlə zədələnə biləcəyi üçün tikinti işləri zamanı svayların yerində saxlanılması qərara alınıb. Beləliklə, tarixi qalıqlar Aare çayının dibində qorunmağa davam edəcək.
Arxeoloqlar gələcək tədqiqatların davam etdiriləcəyini və Roma mühəndisliyi, eləcə də Avropanı Aralıq dənizindən Şimali Avropaya birləşdirən nəqliyyat şəbəkəsi barədə daha çox məlumat əldə etməyi planlaşdırdıqlarını bildiriblər.
Samir
