ABŞ-da yaşayanların demək olar ki, hər ikinci nəfəri son bir il ərzində maliyyə vəziyyətinin pisləşdiyini düşünür. 

HİT.az xəbər verir ki, bu barədə Nyu-York Federal Ehtiyat Bankının (Federal Reserve Bank of New York) keçirdiyi araşdırmanın nəticələrində bildirilir.

Sorğunun nəticələrinə görə, respondentlərin 48%-i ötən ilin may ayı ilə müqayisədə maddi durumlarının pisləşdiyini deyib. Bu göstərici 2023-cü ilin yanvarından bəri ən yüksək səviyyədir.

Eyni zamanda, araşdırma əhali arasında optimizmin azaldığını da göstərib. Gələcəkdə maliyyə vəziyyətinin yaxşılaşacağını gözləyənlərin payı 2022-ci ildən bəri ən aşağı səviyyəyə düşüb. Bundan əlavə, iştirakçıların təxminən 15%-i növbəti 12 ay ərzində işini itirmək ehtimalından narahat olduqlarını bildirib.

Araşdırma təxminən 1,3 min ABŞ ev təsərrüfatı arasında aparılıb. Statistik xəta ilə bağlı məlumat təqdim olunmayıb.

Bundan əvvəl məlum olub ki, ABŞ iqtisadiyyatı 2025-ci ildə 2,2% artıb. Bu, 2024-cü ildəki 2,8%-lik artımdan sonra daha aşağı göstəricidir və 2020-ci ildən bəri ən zəif artım sayılır. Mütəxəssislər bunu Donald Tramp administrasiyası dövründə aparılan tarif siyasətinin təsirləri və hökumət fəaliyyətindəki fasilələrlə (şatdaun) əlaqələndirirlər. Bununla belə, İT sektoruna investisiyaların artması və ixracın yüksəlməsi kəskin zəifləmənin qarşısını alıb.

Samir