Amazoniyanın tropik meşələrində alimlər ölümcül parazit göbələyə demək olar ki, tam bənzəyən yeni hörümçək növü aşkar ediblər. 

HİT.az xəbər verir ki, "Taczanowskia waska" adlandırılan bu canlı Ekvador cəngəlliklərində yarpağa tərs vəziyyətdə yapışmış halda tapılıb. Bu barədə "Daily Star" yazır.

İlkin mərhələdə tədqiqatçılar onu adi bir göbələk zənn ediblər. Lakin daha yaxından araşdırıldıqda bu qəribə formanın əslində unikal maskalanma qabiliyyətinə malik yırtıcı olduğu ortaya çıxıb. "Taczanowskia waska" hörümçəklər arasında ilk dəfə olaraq "Gibellula" adlı göbələyi təqlid edən növ kimi qeydə alınıb — bu göbələk həqiqi “zombi paraziti” hesab olunur və hörümçəkləri yoluxduraraq onların bədənində inkişaf edir.

Bu görünüşü yaratmaq üçün hörümçəyin qarın hissəsində uzanmış çıxıntılar əmələ gəlib və o, göbələk infeksiyasını xatırladan solğun, pastavari rəng alıb. Yarpaqların altında, həmin göbələyin yayıldığı ərazilərdə hərəkətsiz vəziyyətdə qalaraq yırtıcıları aldadır və onların onu çürümüş ov kimi görməsinə səbəb olur.

Samir