Böyük Britaniyanın M49 avtomagistralında təxminən 50 milyon funt-sterlinq (təxminən 67 milyon ABŞ dolları) dəyərində inşa edilən yol qovşağı artıq yeddi ilə yaxındır istifadəsiz vəziyyətdədir. Onun iki çıxışı isə heç bir yola qoşulmur və heç yerə aparmır.
HİT.az xəbər verir ki, “Libertatea” nəşrinin məlumatına görə, bu nəqliyyat qovşağı 2019-cu ildə tikilib. Lakin torpaq mülkiyyəti ilə bağlı mübahisələr və inzibati gecikmələr səbəbindən hələ də istifadəyə verilməyib.
Layihə Avonmutdakı böyük sənaye parkına yük maşınlarının sürətli çıxışını təmin etməli idi, lakin yaxınlaşma yolunun olmaması obyektin istifadəsini bloklayıb. Ərazidən keçən sürücülər vəziyyəti “absurd” kimi qiymətləndirirlər.
“Bu, tam bir farsdır, tam bir dəlilikdir”, deyə Nyuportdan olan yük maşını sürücüsü Devid Bradberi jurnalistlərə bildirib.
Məlumata görə, M49 avtomagistralı 1996-cı ildə M5 magistralı ilə Uels Şahzadəsi körpüsü arasında 8 kilometrlik hissə kimi inşa edilib. Sonradan bölgədə təxminən 300 akr (təxminən 1,2 kvadrat kilometr) sahəyə malik böyük logistik park formalaşıb.
Yük daşımalarının daha rahat olması üçün Böyük Britaniya hökuməti 2018-ci ildə M49 üzərində ikili yol qovşağının tikintisinə başlayıb. İşlər 2019-cu ilin dekabrında başa çatdırılsa da, təxminən 160 metr uzunluğunda giriş yolunun olmaması səbəbindən qovşaq istifadəyə verilməyib.
Nəşrin yazdığına görə, problem torpaq sahibləri, Cənubi Qlosterşir Şurası və milli avtomobil yolları idarəetmə şirkəti arasında yaranan mübahisələrdən qaynaqlanır. Yaxınlaşma yolunun olmaması səbəbindən yük maşınları A403 kimi alternativ marşrutlardan istifadə etmək məcburiyyətində qalır ki, bu da tez-tez tıxaclara və gecikmələrə səbəb olur.
“Hazırda tıxaclar zamanı alternativ yollar səbəbilə təxminən bir saat vaxt itirə bilirəm”, yerli sürücülərdən biri bildirib.
Bundan əlavə, layihə ekoloji tələblərə görə də gecikib. Qorunan növlər – su samurları və daraqlı tritonlar kimi canlıların qorunması ilə bağlı əlavə icazələr tələb olunub. Həmçinin milli velosiped şəbəkəsinə aid yolun köçürülməsi də əlavə bürokratik mərhələlər yaradıb.
Bağlayıcı yolun tikintisinə 2025-ci ildə başlanılıb və işlərin 2026-cı ilin sonuna qədər tamamlanması planlaşdırılır.
Samir
