Fransa sahillərində dərin dəniz sularında inşa edilən yeni üzən külək elektrik stansiyası tam gücü ilə fəaliyyətə başlayıb. Üzən platformalar üzərində quraşdırılmış üç nəhəng turbin təkcə təmiz enerji istehsal etmir, həm də süni rif sistemi vasitəsilə dəniz canlılarının, xüsusilə balıq populyasiyasının qorunmasına xidmət edir.
HİT.az xəbər verir ki, dənizin dərin olması səbəbindən ənənəvi sabit külək turbinlərinin quraşdırılmasının mümkün olmadığı ərazilər üçün hazırlanan layihədə platformalar polad anker sistemləri ilə dəniz dibinə bərkidilib. Bu texnologiya Aralıq dənizinin yüksək külək potensialından daha səmərəli istifadə etməyə imkan yaradır.
"EDP Renewables" və "ENGIE" şirkətlərinin birgə yaratdığı "Ocean Winds" şirkəti Fransanın Oksitaniya sahillərindən təxminən 10 dəniz mili aralıda yerləşən "Éoliennes Flottantes du Golfe du Lion" (EFGL) layihəsinin tam gücü ilə işlədiyini açıqlayıb.
Bu obyekt 25 meqavat gücündə olan "Provence Grand Large" layihəsindən sonra Fransanın ikinci üzən külək elektrik stansiyası hesab olunur. Kompleksin tərkibinə hər biri 10 meqavat gücündə olan üç külək turbini daxildir.
Layihənin əsas xüsusiyyətlərindən biri "ECOCEAN" şirkəti ilə birlikdə hazırlanmış "Biohut" texnologiyasıdır. Bu sistem çərçivəsində üzən platformalardan birinə 32 xüsusi süni yaşayış modulu quraşdırılıb.
Təbii dəniz sığınacaqlarını təqlid edən polad konstruksiyaların alt hissəsi qida zəncirinin əsasını təşkil edən istiridyə qabıqları ilə örtülüb. Xarici qoruyucu qəfəs isə balıq balalarının yırtıcılardan qorunaraq inkişaf etməsinə şərait yaradır.
Beləliklə, layihə yalnız dəniz dibində deyil, həm də suyun səthinə yaxın hissədə süni rif yaradan dünyada ilk belə enerji layihəsi kimi qiymətləndirilir.
"Ocean Winds" şirkətinin Fransadakı baş direktoru Mark Hirt bildirib ki, bu üzən texnologiya Aralıq dənizində külək enerjisinin inkişaf strategiyasında mühüm rol oynayacaq.
Gələcəkdə platformaların servis gəmilərini açıq dənizdə simsiz enerji ilə doldura bilən maqnit əsaslı sistemlərlə təchiz edilməsi planlaşdırılır. Şirkət hesab edir ki, layihənin ekoloji nəticələri uğurlu olarsa, bu model gələcək bərpa olunan enerji layihələri üçün nümunə ola bilər.
Samir
