Uşaqların düzgün tərbiyəsi valideynlərdən səbir, ardıcıllıq və diqqətli ünsiyyət tələb edir. Gündəlik həyatda tətbiq olunan bir neçə sadə vərdiş uşaqların davranışlarına müsbət təsir göstərə, onlara qaydaları anlamağı və öz hisslərini ifadə etməyi öyrədə bilər.

HİT.az xəbər verir ki, bu barədə Britaniyanın “Mirror” nəşri məlumat yayıb.

Qaydaları ardıcıl tətbiq edin

Valideynlər uşaqlar üçün müəyyən etdikləri qaydalara özləri də əməl etməli və qərarlarını uşağın israrı qarşısında tez-tez dəyişməməlidirlər. Aydın sərhədlər uşaqlarda təhlükəsizlik hissini gücləndirir və onlardan hansı davranışların gözlənildiyini anlamağa kömək edir.

Uşağın hisslərini nəzərə alın

Uşağın kədərini, incikliyini və ya məyusluğunu qəbul etmək onun hər istəyini yerinə yetirmək demək deyil. Əsas məsələ uşağa hisslərinin başa düşüldüyünü göstərməkdir. Bu yanaşma uşaqların emosiyalarını tanımasına və onları daha düzgün ifadə etməsinə kömək edir.

Uşaqları diqqətlə dinləyin

Mütəxəssislər valideynlərə uşaqları ilə danışarkən telefon və digər diqqətyayındırıcı vasitələrdən uzaq durmağı tövsiyə edirlər. Söhbət zamanı uşağa tam diqqət ayırmaq və göz təması qurmaq onun özünü dəyərli hiss etməsinə şərait yaradır. Uşaqlar valideynlərinin onları həqiqətən dinləyib-dinləmədiyini hiss edə bilirlər.

Qadağaların səbəbini izah edin

Uşağın istəyinə sadəcə “yox” demək əvəzinə, qərarın səbəbini açıqlamaq daha faydalıdır. Məsələn, hava qaraldığı üçün parka getməyə icazə verilmirsə, gəzintini həftəsonuna planlaşdırmaq təklif oluna bilər. Eyni şəkildə, məktəbə görə gec yatmağa icazə verilməməsinin səbəbini izah etmək uşağın qərarı daha yaxşı anlamasına kömək edir.

Nəşr vurğulayır ki, valideynlərin ardıcıl davranışı, uşaqların hisslərinə hörmətlə yanaşması və onlarla açıq ünsiyyət qurması düzgün davranış vərdişlərinin formalaşmasında mühüm rol oynayır.

Samir