Qış mövsümünün yaxınlaşması ilə əlaqədar olaraq Azərbaycanın kənd təsərrüfatı bazarlarında tərəvəzlərə olan tələbat nəzərəçarpan dərəcədə artıb.
 
Vətəndaşların qış tədarükü çərçivəsində ən çox üstünlük verdikləri məhsullardan biri də sarımsaqdır. Xüsusilə şoraba, turşu və müxtəlif konserva məhsullarının hazırlanmasında sarımsaqdan geniş istifadə olunur. Məhsula olan kütləvi tələbatın artması öz növbəsində bazarlardakı satış qiymətlərinə də birbaşa təsir göstərib. 

Hit.az-ın əməkdaşı bu dəfə bazarda sarımsaq qiymətləri ilə maraqlanıb.

Hazırda pərakəndə satış piştaxtalarında sarımsağın bir kiloqramı alıcılara 4-5 manat aralığında təklif edilir. Qiymətlərdəki bu artım qışlıq hazırlıq görən ailələrin büdcəsində əlavə xərc yaradır. Satıcılar qiymət yüksəlməsini bazara çıxarılan yerli məhsulun həcminin azalması və daşınma xərclərinin artması ilə əlaqələndirirlər. Həmçinin, mövsümi tələbatın pik həddə çatması da topdansatış qiymətlərinin yuxarı qalxmasına zəmin yaradır. Alıcılar isə əksinə, mövsümün qızğın vaxtında tərəvəzin bu qiymətə satılmasını süni bahalaşma kimi qiymətləndirirlər. 

Bəzi vətəndaşlar xərclərini azaltmaq üçün sarımsağı tək-tək kiloqramla deyil, topdansatış mərkəzlərindən bağlama ilə almağa üstünlük verirlər. Buna baxmayaraq, milli mətbəxdə qış turşularının əsas tərkib hissəsi olan sarımsağa olan maraq səngimək bilmir. Bazarlarda aparılan müşahidələr göstərir ki, alıcı axını növbəti günlərdə də yüksək səviyyədə qalmaqda davam edəcək...

Pərviz