Dünya daim dəyişir və onilliklər əvvəl normal qəbul edilən davranışlar bu gün getdikcə daha çox köhnəlmiş və ya hətta qəbuledilməz görünür. Gənc nəsillər, xüsusilə zumerlər, yalnız valideynlərinin deyil, nənə və babalarının bəzi vərdiş və düşüncələrinə də həssas yanaşırlar.

HİT.az xəbər verir ki, “YourTango” nəşrinin yazdığına görə, gənc nəsil sürətli texnoloji dəyişikliklərin və fərdiliyə hörmətin hökm sürdüyü dünyada böyüyüb. Buna görə də gənclər yaşlıların həddindən artıq mühafizəkarlığına və müəyyən kollektiv yanaşmalarına daha kəskin reaksiya verirlər.

Sosial münasibətlər üzrə diplomu olan məqalə müəllifi Zayda Slabekorn qeyd edir ki, nəsillərin fərqli həyat təcrübəsi onların müxtəlif dəyərlər formalaşdırmasına səbəb olur və bu da münaqişələrə yol açır. O, yaşlı nəsillərin zumerləri xüsusilə qıcıqlandıran davranışlarından bəhs edib.

Xidmət sahəsində çalışanlarla mübahisə etmək

Yaşlı nəsillərin nümayəndələri tez-tez “müştəri həmişə haqlıdır” və “hamı mənə borcludur” prinsipləri ilə davranırlar. Zumerlər üçün isə belə münasibət xidmət əməkdaşına bir insan kimi hörmətsizlik təsiri bağışlayır. Onların fikrincə, əsas məsələ insanın öz şəxsiyyətinə hörmət edilməsidir.

İş və şəxsi həyat arasındakı sərhədləri pozmaq

Zumerlər əmək bazarına nisbətən yaxın zamanda daxil olsalar da, bir çox işəgötürən artıq anlayır ki, gənc nəsil əmək müqaviləsində nəzərdə tutulandan daha çox işləməyə məcbur edilməyə dözməyəcək.

Karyera naminə əlavə saatlarda işləməyə dair israrlı tələblər gənclərdə şübhə yaradır. Onların fikrincə, iş həyatın əsas hissəsinə çevrilməməlidir.

Kobud və ya yersiz zarafatlar etmək

Məqalədə yumorun qavranılmasındakı fərqlərdən də bəhs edilir. Yaşlı nəsillər üçün adi zarafat sayılan ifadələr Z nəsli tərəfindən bəzən təhqiredici və ya qəbuledilməz hesab olunur.

Xəbərdarlıq etmədən qonaq gəlmək

Gözlənilməz ziyarətlər də nəsillərarası münaqişələrin səbəblərindən biridir. Müəllif qeyd edir ki, yaşlı insanlar ənənəvi olaraq ailə bağlarına və spontan ünsiyyətə böyük əhəmiyyət verirlər.

Zumerlər isə sosial əlaqələri əvvəlcədən planlaşdırmağa və şəxsi məkanlarını daha aydın şəkildə qorumağa üstünlük verirlər.

İstənilməyən məsləhətlər vermək

Onilliklər əvvəl yaşlılara qeyd-şərtsiz hörmət sosial norma hesab olunurdu və onların məsləhətləri də mühüm kömək kimi qəbul edilirdi. Buna görə yaşlı nəslin nümayəndələrinin gənclərə səmimi şəkildə məsləhət verməsi təəccüblü deyil.

Lakin bu məsləhətlər zumerlər tərəfindən bəzən anlaşılmazlıqla qarşılanır. Onların fikrincə, məsləhətə ehtiyacları olduqda özləri soruşacaqlar. Buna qədər isə verilən məsləhət başqasının fikrinin məcburi şəkildə qəbul etdirilməsi kimi görünür.

Mesaj yazmaq əvəzinə zəng etmək

Z nəsli mətn mesajlarına daha çox üstünlük verir. Telefon zəngləri bəzi gənclər üçün narahatlıq yarada bilər. Yaşlı nəsillər isə səsli ünsiyyəti daha səmimi və diqqətli münasibət kimi qəbul edirlər. Telefon etiketinə fərqli yanaşmalar anlaşılmazlıqlara səbəb olur.

“Mən sənin yaşında olanda...” demək

Belə ifadələr adətən gənclərə keçmiş təcrübə əsasında məsləhət vermək cəhdi olur. Lakin bu cür müqayisələr gizli tənqid və ya gəncin üzləşdiyi çətinliklərin kiçildilməsi kimi qəbul edilə bilər.

Üstəlik, 20, 30 və ya 40 il əvvəlki həyat təcrübəsi müasir iqtisadi reallıqlara və sosial normalara çox vaxt uyğun gəlmir.

Sərt geyim qaydaları tətbiq etmək

Zumerlər daha çox rahatlığa və fərdiliklərini ifadə etmək imkanına üstünlük verirlər. Buna görə sərt ofis geyim qaydalarını keçmişin qalığı kimi qəbul edirlər.

İş mühiti gənc nəslin məqbul davranış və xarici görünüşlə bağlı ənənəvi təsəvvürləri fəal şəkildə dəyişdirdiyi sahələrdən birinə çevrilib.

Samir