Kotlet hazırlayarkən qiyməyə çörək əlavə etmək uzun illərdir istifadə olunan üsuldur. Lakin bəzi aşpazlar hesab edirlər ki, çörəyi başqa ərzaqlarla əvəz etməklə ətin dadını daha yaxşı qorumaq və kotletləri daha şirəli etmək mümkündür.

HİT.az-ın məlumatına görə, çörəyin əvəzinə istifadə edilə biləcək məhsullardan biri adi qida sodasıdır. O, ətin bişərkən çox sıxılmasının qarşısını almağa və nəmin daha yaxşı saxlanmasına kömək edir. Nəticədə, xüsusilə yağsız toyuq ətindən hazırlanan kotletlər də yumşaq və şirəli alınır. Bununla belə, sodanı normadan artıq əlavə etmək olmaz: bir kiloqram qiyməyə yarım çay qaşığından çox istifadə edilməməsi tövsiyə olunur.

Digər alternativ isə manna yarmasıdır. Bu məhsul qiymədəki nəmi saxlamağa kömək edir, kotletlərə yumşaq və havalı quruluş verir, eyni zamanda ətin dadını ön plana çıxarır.

Mannalı, çörəksiz kotletin hazırlanması üçün bir kiloqram qiymə, bir yumurta, iki baş soğan, dörd xörək qaşığı manna yarması, yarım çay qaşığı soda, duz, istəyə uyğun ədviyyatlar və qızartmaq üçün bitki yağı lazımdır.

Hazırlanma qaydası da sadədir. Qiyməyə xırda doğranmış soğan, yumurta, manna yarması, soda və ədviyyatlar əlavə edilərək yaxşıca qarışdırılır. Daha sonra qarışıq ən azı 30 dəqiqə soyuducuda saxlanılır ki, inqrediyentlər bir-birinə yaxşı qarışsın.

Kotletlər əvvəlcədən qızdırılmış tavada yağda hər iki tərəfi təxminən beş dəqiqə olmaqla qızardılır. Ardınca qapaq örtülərək zəif odda daha yeddi dəqiqə bişirilir. Mütəxəssislər daha şirəli nəticə əldə etmək üçün nisbətən yağlı ət seçməyi də məsləhət görürlər.

Samir