Bəzi insanlar mübahisə zamanı, pis xəbər eşidəndə və ya gərgin vəziyyətlə qarşılaşanda qəfil gülməyə başlayırlar. Kənardan laqeydlik və ya hörmətsizlik kimi görünən bu davranış əslində orqanizmin stresə verdiyi qeyri-iradi reaksiya ola bilər.

HİT.az xəbər verir ki, bu barədə “El Español” məlumat yayıb.

Psixoloq Silvia Severinonun sözlərinə görə, gərgin anlarda gülmək insanın emosiyaları necə emal etməsi ilə birbaşa əlaqəlidir. Belə reaksiya qarşı tərəfi ələ salmaq məqsədi daşımaya, əksinə, beynin emosional yüklənmənin öhdəsindən gəlmək cəhdi ola bilər.

Məlumata görə, güclü stress və təhlükə hissi zamanı orqanizmdə kortizol və adrenalin kimi hormonların səviyyəsi artır. İnsan hər zaman vəziyyətlə mübarizə aparmaq və ya ondan uzaqlaşmaq imkanına malik olmadığından yaranan gərginlik müxtəlif yollarla üzə çıxa bilər. Əsəbi gülüş də bu reaksiyalardan biridir. Gülüş zamanı diafraqmanın yığılması və nəfəsvermənin dəyişməsi fiziki gərginliyin azalmasına kömək edə bilər.

Mütəxəssislər bildirirlər ki, insan özünü mühakimə olunan və ya diqqət mərkəzində hiss etdikdə də qeyri-iradi gülə bilər. Bu, çətin vəziyyətin ciddiliyini azaltmaq və ya özünü daha rahat hiss etmək cəhdi kimi ortaya çıxa bilər.

Belə davranışa xüsusilə uşaqlıq və yeniyetməlik dövründə rast gəlinir. Həmin mərhələlərdə emosiyaları idarə etmək bacarıqları hələ formalaşır. Bununla belə, əsəbi gülüş bəzi insanlarda yetkinlik dövründə də davam edə bilər.

Yazıda vurğulanır ki, əsas problem gülüşün özündən çox, ətrafdakıların bu reaksiyanı necə başa düşməsidir. İnsan daxilən qorxu və narahatlıq keçirə bilər, lakin başqaları onun gülüşünü laqeydlik və ya istehza kimi qəbul edə bilər. Bu anlaşılmazlıq isə utanc və günahkarlıq hissini artıraraq emosional gərginliyi daha da gücləndirə bilər.

Qeyd olunur ki, stresli vəziyyətlərdə arabir əsəbi gülmək öz-özlüyündə psixoloji pozuntu əlaməti sayılmır. Belə hallara daha anlayışla yanaşmaq və insanın daxili vəziyyətini yalnız xarici reaksiyasına əsasən qiymətləndirməmək tövsiyə edilir.

Samir