Yay aylarında kəskin bağırsaq infeksiyalarının daha tez-tez qeydə alınmasının əsas səbəbi isti havada bakteriyaların sürətlə çoxalmasıdır. 

HİT.az xəbər verir ki, bu barədə qida gigiyenası üzrə həkim və qida təhlükəsizliyi auditoru Yekaterina Quzman gazeta.ru-ya müsahibəsində bildirib.

Onun sözlərinə görə, +20 ilə +40 dərəcə Selsi arasında bakteriyalar xüsusilə sürətlə çoxalır. Hazır yeməklər bir neçə saat soyuducudan kənarda qaldıqda mikroorqanizmlərin sayı həndəsi silsilə ilə arta bilər.

Həkim bildirib ki, qida infeksiyalarının yaranma riskini artıran əsas amillər bunlardır:

* məhsulların daşınması zamanı soyuq zəncirin pozulması;
* çiy məhsullar və hazır yeməklər üçün eyni mətbəx alətlərindən istifadə edilməsi;
* qidanın kifayət qədər bişirilməməsi;
* şəxsi gigiyena qaydalarına əməl olunmaması;
* yeməklərin təkrar qızdırılması;
* hazır qidaların otaq temperaturunda uzun müddət saxlanılması.

Yekaterina Quzman xüsusilə hazır yeməklərin çatdırılmasına diqqət yetirməyin vacibliyini vurğulayıb. O qeyd edib ki, yemək bütün sanitar normalara uyğun hazırlansa belə, lazımi temperatur rejimi qorunmadan uzun müddət daşındıqda bakteriyaların sürətlə çoxalması üçün əlverişli şərait yaranır.

Onun sözlərinə görə, havanın temperaturu +30 dərəcəni keçdikdə risk daha da artır. Qida nə qədər uzun müddət soyuducu və ya termal çantadan kənarda qalarsa, onun sağlamlıq üçün təhlükəli olma ehtimalı da bir o qədər yüksəlir.

Bu qayda mağazadan alınan hazır kulinariya məhsulları, ət, balıq, süd məhsulları və yarımfabrikatlara da aiddir. Mütəxəssis bildirib ki, isti havada bu məhsulların avtomobil salonunda uzun müddət soyudulmadan daşınması bakterial çirklənmə riskini artırır.

Həkim məhsulların çatdırılma müddətini mümkün qədər qısaltmağı, termoçantalardan və ya soyuducu çantalardan istifadə etməyi, evə çatan kimi tez xarab olan məhsulları dərhal soyuducuya yerləşdirməyi tövsiyə edib.

Yekaterina Quzman əlavə edib ki, ərzaq paketlərini "sonra yerləşdirərəm" düşüncəsi ilə avtomobildə saxlamaq olmaz. Onun sözlərinə görə, günəş altında qızmış avtomobildə cəmi 1–1,5 saat ərzində temperatur qida təhlükəsizliyi üçün kritik həddə çata bilər.

Samir