Psixoloq qısqanclıqla mübarizə aparmağın yollarını açıqladı

SOSİAL
22:53 / 20.11.2026
61

Partnyorunun sədaqətinə şübhə edən insanlar yaranan qısqanclıq hissinə görə davamlı yoxlamalar aparmaq əvəzinə, münasibətlərdəki problemləri açıq şəkildə müzakirə etməlidirlər.

HİT.az xəbər verir ki, bu barədə psixoloq və seksoloq Aleksandra Miller “aif.ru” nəşrinə açıqlamasında danışıb.

Mütəxəssisin sözlərinə görə, qısqanclıq münasibətlərdə diqqət tələb edən müəyyən problemlərin göstəricisi ola bilər. Buna görə də bu hissi qarşı tərəfi daim nəzarətdə saxlamaq üçün səbəbə çevirmək düzgün deyil.

Miller bildirib ki, partnyorun telefonunu gizlicə yoxlamaq, yazışmalarını oxumaq və onu daim izləmək yaranmış şübhələri aradan qaldırmır. Əksinə, bu cür davranışlar münasibətlərdə etimadı daha da zəiflədə bilər. Problemin həlli üçün tərəflərin sakit şəkildə danışması və onları narahat edən məqamları müzakirə etməsi vacibdir.

Psixoloq xəyanət ehtimalı ilə bağlı diqqət çəkə biləcək bəzi davranış dəyişikliklərini də sadalayıb. Onların arasında partnyorun qəfil əsəbi və ya emosional baxımdan uzaq davranması, eləcə də gözlənilmədən həddindən artıq qayğıkeş olması var.

Bundan başqa, telefondan istifadə vərdişlərinin dəyişməsi, ekranın gizlədilməsi, yeni şifrənin qoyulması, qarşı tərəfə göstərilən diqqətin azalması, yaxınlığın zəifləməsi və birgə planların getdikcə azalması da müzakirə üçün əsas ola bilər.

Bununla belə, qeyd olunan davranışların heç biri özlüyündə xəyanətin sübutu hesab edilmir. Millerin fikrincə, əsas məsələ şübhələrə qapılaraq nəzarəti artırmaq deyil, münasibətlərdəki dəyişikliklərin səbəbini aydınlaşdırmaq və qarşılıqlı etimadı qorumağa çalışmaqdır.

Samir

0