Fıstıq kalium, zülal, lif və antioksidantlarla zəngin olduğu üçün sağlam qidalanmada mühüm yer tuta bilər. Bu çərəzin müntəzəm və ölçülü şəkildə istehlakı ürək-damar sisteminin fəaliyyətini dəstəkləməyə, qan təzyiqinin tənzimlənməsinə və xolesterin səviyyəsinin qorunmasına kömək edə bilər.
HİT.az xəbər verir ki, Ukraynanın UNIAN nəşrinin Planeta.pl portalına istinadən yaydığı məlumata görə, 100 qram fıstığın tərkibində təxminən 1020 milliqram kalium var. Bu mineral əzələlərin fəaliyyəti, enerji mübadiləsi və sinir sisteminin normal işləməsi üçün vacibdir.
Fıstığın tərkibində əsasən doymamış yağ turşuları və fitosterollar da mövcuddur. Onların doymuş yağlarla zəngin qəlyanaltıların əvəzinə istehlak edilməsi xolesterin səviyyəsinin aşağı salınmasına və ürək sağlamlığının qorunmasına töhfə verə bilər.
Bu çərəz polifenollar, karotinoidlər və E vitamini kimi antioksidantlarla da zəngindir. Həmin maddələr hüceyrələrin oksidləşdirici zədələnmədən qorunmasına kömək edir. Fıstığın tərkibindəki zülal və lif isə toxluq hissini uzadır, iştahanın idarə olunmasını asanlaşdırır. Bundan başqa, onun tərkibində olan B6 vitamini sinir sisteminin normal fəaliyyəti və neyromediatorların istehsalı üçün əhəmiyyətlidir.
Mütəxəssislər fıstığın duzsuz, şəkərsiz və əlavə qatqılar olmadan istehlak edilməsini tövsiyə edirlər. Gündə təxminən 25–30 qram, yəni bir ovuc fıstıq yemək kifayət edə bilər. Onu yulaf sıyığına, təbii yoqurta və salatlara əlavə etmək, həmçinin balıq yeməkləri ilə birlikdə istifadə etmək mümkündür.
Bununla belə, fıstıq yüksək kalorili məhsuldur: 100 qramında təxminən 560 kilokalori var. Buna görə də porsiyanın ölçüsünə diqqət yetirmək vacibdir. Duzlu fıstıq natrium qəbulunu artıraraq qan təzyiqinə mənfi təsir göstərə bilər.
Fıstığa allergiyası olanlar bu məhsuldan uzaq durmalıdırlar. Xroniki böyrək xəstəliyi və ya qanda kaliumun yüksək səviyyəsi olan şəxslər də fıstığı qida rasionuna daxil etməzdən əvvəl həkimlə məsləhətləşməlidirlər.
Qeyd edək ki, fıstığın faydaları onu həddindən artıq yeməkdən deyil, balanslaşdırılmış qidalanmanın bir hissəsi kimi müntəzəm və ölçülü istehlak etməkdən qaynaqlanır.
Samir
