Bakının Suraxanı rayonunun Hövsan qəsəbəsində yeni tədris ili başlayar-başlamaz valideynlərdən pul yığılması ilə bağlı iddia müzakirələr yaradıb. Bununla bağlı sosial şəbəkədə paylaşım edilib.
Qeyd olunub ki, sentyabrın 7-də "WhatsApp" qrupunda 76 nömrəli tam orta ümumtəhsil məktəbindəki valideyn komitələrindən birinin rəhbəri valideynlərə fond pulunun yığılmasının zəruri olduğunu bildirib.
Oxu.Az-ın sorğusuna cavab olaraq həmin məktəbdən bildirilib ki, sözügedən səsyazısı üç il əvvələ aiddir:
"Məktəbdə vəsait toplanması iddiası ilə əlaqədar sosial şəbəkədə yayılan səsyazısında adı çəkilən müəllimlə bağlanmış əmək müqaviləsinə yaş həddi ilə əlaqədar ötən tədris ilində xitam verilib. Səsi yayılmış valideyn məktəbə dəvət olunub, verdiyi yazılı məlumatla səsyazısının üç il əvvələ aid olduğunu bildirib.
Qeyd edək ki, bu kimi təşəbbüslərin yolverilməzliyi mütəmadi olaraq valideynlərin və müəllimlərin diqqətinə çatdırılır", - deyə məktəbdən bildirilib.
Valideynlər isə Oxu.Az-a açıqlamalarında iddia ediblər ki, sözügdən fakt üç il əvvələ aid deyil. Həmin müəllim bu il məktəblə vidalaşır və bu səbəbdən ona gül almaq üçün valideynlərdən pul yığılıb.
