Oktyabr ayında qlobal elektrikli avtomobil bazarında satışlar ötən ilin eyni dövrü ilə müqayisədə 8 faiz artaraq 2,09 milyon ədədə çatıb. Artımın əsas hərəkətverici qüvvəsi Avropa olub. Çin bazarında isə geriləmə qeydə alınıb.

HİT.az xəbər verir ki, bu barədə “Benchmark Mineral Intelligence” araşdırma şirkətinin məlumatlarında bildirilir.

Göstəricilərə tam elektrikli avtomobillərlə yanaşı, enerji mənbəyindən doldurula bilən hibridlər və yüngül kommersiya nəqliyyat vasitələri də daxildir. Sentyabrla müqayisədə satışlar 3 faiz azalıb. Bununla belə, 2026-cı ilin ilk 10 ayında dünyada ümumilikdə 17,5 milyon elektrikli avtomobil satılıb ki, bu da illik müqayisədə 5 faiz artım deməkdir.

Avropada satışlar 36 faiz yüksəlib

Oktyabrda Avropada 510 min elektrikli avtomobil alıcılara təqdim edilib. İllik artım 36 faiz təşkil edib. Tam elektrikli modellərin satışında 49 faiz, şarj olunan hibridlərdə isə 7 faiz artım qeydə alınıb.

Almaniya regionda diqqətçəkən nəticə göstərib. Ölkədə tam elektrikli avtomobillərin satışı təxminən 80 faiz artaraq 95 mini ötüb. Elektrikli modellərin yeni avtomobil bazarındakı payı isə 45 faizi keçib. Portuqaliyada bu göstərici 55 faizə çatıb, Böyük Britaniyada satışlar 30 faiz artıb.

Çində daxili satışlar azalıb, ixrac yüksəlib

Dünyanın ən böyük elektrikli avtomobil bazarı olan Çində oktyabrda 1,14 milyon satış qeydə alınıb. Bu, ötən ilin eyni ayı ilə müqayisədə 12 faiz azdır. Bununla yanaşı, Çin istehsalçıları ixracı artırmaqla daxili bazardakı geriləməni kompensasiya etməyə çalışırlar. Oktyabrda ölkədən yeni enerjili minik avtomobillərinin ixracı 600 minə yaxınlaşaraq aylıq rekord vurub.

Şimali Amerikada ilin ilk artımı

Şimali Amerikada elektrikli avtomobil satışları 24 faiz artaraq 130 minə çatıb. Beləliklə, region 2026-cı ildə ilk dəfə illik artım nümayiş etdirib. ABŞ-da təxminən 110 min avtomobil satılıb. Lakin ekspertlər artımın əsas səbəblərindən birinin ötən ilin sentyabrında federal vergi güzəştinin başa çatmasından sonra müqayisə bazasının dəyişməsi olduğunu bildirirlər.

Çin, Avropa və Şimali Amerikadan kənar bazarlarda da ciddi yüksəliş müşahidə olunub. Bu ölkələrdə satışlar 85 faiz artaraq 300 minə çatıb. Avstraliyada elektrikli avtomobil satışları üç dəfədən çox yüksəlib. Braziliyada da artım qeydə alınıb.

Samir