Yüksək arterial təzyiqin nəzarətdə saxlanılmasında düzgün qidalanma mühüm rol oynayır. Dietoloqlar ürək-damar sisteminin sağlamlığını qorumaq və təzyiqin aşağı salınmasına kömək etmək üçün dörd əsas qida qrupunun gündəlik rasiona daxil edilməsini tövsiyə edirlər.

HİT.az xəbər verir ki, bu barədə “Mindmegette” nəşri Britaniya Ürək Fondunun aparıcı dietoloqu Viktoriya Teylorun açıqlamalarına istinadən yazıb.

Mütəxəssis yüksək təzyiqlə mübarizədə tərəvəz, meyvə, yağsız zülal, tam taxıllı və az yağlı süd məhsullarına əsaslanan DASH qidalanma modelinin faydalı olduğunu bildirib.

1. Tərəvəz və meyvələr

Təzyiqin tənzimlənməsinə kömək edən məhsullar arasında çuğundur xüsusi qeyd olunur. Araşdırmalara görə, çuğundur şirəsindəki nitratlar orqanizmdə azot oksidinə çevrilərək damarların genişlənməsinə və qan dövranının yaxşılaşmasına kömək edə bilər.

Bundan əlavə, kərəviz, kələm, çiyələk və banan da rasion üçün faydalı seçimlər hesab olunur.

2. Yağsız zülal mənbələri

Dietoloqlar yağlı qırmızı ət və emal olunmuş ət məhsullarının əvəzinə toyuq döşü, hinduşka, balıq, yumurta və paxlalılara üstünlük verməyi məsləhət görürlər.

Mərci, lobya və noxud həm zülal, həm də liflə zəngindir. Bu məhsullar uzun müddət toxluq hissi yaradır və çəkinin idarə olunmasına kömək edir. Artıq çəkidən azad olmaq isə arterial təzyiqin azalmasına müsbət təsir göstərə bilər.

3. Tam taxıllı məhsullar

Ağ çörək, ağ düyü və rafinə edilmiş undan hazırlanan qidaların əvəzinə qəhvəyi düyü, yulaf və tam taxıllı çörək seçilməsi tövsiyə olunur.

Bu məhsullar lif və faydalı qida maddələri ilə zəngindir. Onların müntəzəm istehlakı həzmi yaxşılaşdırmaqla yanaşı, ürək sağlamlığının qorunmasına və çəkinin tənzimlənməsinə də dəstək verir.

4. Az yağlı süd məhsulları

Viktoriya Teylor süd, təbii yoqurt və kefir kimi az yağlı məhsulların da qidalanmada yer almasını tövsiyə edib. Bu qidalar sümüklərin və ürək-damar sisteminin fəaliyyəti üçün vacib olan kalsiumla zəngindir. Araşdırmalarda kalsium qəbulu ilə arterial təzyiqin müsbət göstəriciləri arasında əlaqə müəyyən edilib.

Mütəxəssislər vurğulayırlar ki, sadalanan məhsulların müntəzəm istehlakı ürək-damar sağlamlığını dəstəkləyə və təzyiqin nəzarətdə saxlanılmasına kömək edə bilər. Bununla belə, düzgün qidalanma həkimin təyin etdiyi müalicəni əvəz etmir.

Yüksək arterial təzyiq aşkarlanan şəxslərə mütəxəssisə müraciət etmək və təzyiq göstəricilərini mütəmadi yoxlamaq tövsiyə olunur.

Samir