Çin NATO-nu Soyuq müharibə zehniyyətindən əl çəkməyə çağırdı

DÜNYA
13:30 / 11.07.2024
125

Çin NATO-nun ayrı-ayrı ölkələr üçün hegemonluq alətinə çevrilməsini istəmir və alyansdan Soyuq müharibə zehniyyətindən əl çəkməsini xahiş edir. 

HİT.az xəbər verir ki, müvafiq bəyanat Çinin Avropa İttifaqındakı nümayəndəliyinin saytında dərc olunub.

"Biz NATO-nu yolunu azmamağa və müdafiə təşkilatı kimi mövqeyini qoruyub saxlamağa, bəzi böyük dövlətlərin hegemonluq alətinə çevrilməməyə çağırırıq", deyə mesajda qeyd edilir.

Diplomatlar Çinin dinc qlobal inkişafın və beynəlxalq asayişin qorunmasının tərəfdarı olduğunu qeyd edərək, NATO-dan “Çin təhlükəsi”ndən danışmağı, münaqişələri qızışdırmağı dayandırmağı, əvəzində dünyada sabitliyi təmin etmək üçün tədbirlər görməyi tələb ediblər.

Çin NATO-nu başqalarını ittiham etmək əvəzinə Ukrayna münaqişəsi zamanı öz hərəkətləri üzərində düşünməyə çağırıb. Çin diplomatları NATO ölkələrinə “beynəlxalq ictimaiyyətin ədalətli mühakimələrinə diqqətlə qulaq asmağı” və Ukrayna münaqişəsində “hərəkətləri haqqında dərindən düşünməyi” tövsiyə ediblər.

Bundan əlavə, Çin NATO-nun diqqətini “günahı başqalarının üzərinə atmaq əvəzinə vəziyyəti yumşaltmaq və problemi həll etmək üçün real addımlar atmağın” zəruriliyinə yönəldib.

Bundan əvvəl Çinin ABŞ-dakı səfirliyi Pekinin Ukrayna münaqişəsindəki rolundan danışıb. Diplomatik departamentin şərhində bildirilir ki, Çin Ukraynadakı böhranın təşəbbüskarı və ya tərəfdaşı deyil. Həmçinin qeyd olunur ki, Pekin sülhün bərqərar olması naminə danışıqların aparılmasına yardım etmək öhdəliyinə sadiqdir. Çin münaqişə tərəflərinə silah vermir və ikili təyinatlı malların ixracına ciddi nəzarət edir.

İyulun 11-də NATO-nun baş katibi Yens Stoltenberq bildirib ki, Çinin Rusiyaya dəstəyi alyans üçün təhlükəsizliyə təhdiddir. Buna görə də dayandırılmalıdır. Bundan başqa, NATO-nun Vaşinqtonda keçirilən sammitində qəbul edilən yekun bəyannamədə Şimali Atlantika Alyansı bütün dünya ölkələrini Ukrayna münaqişəsinə görə Rusiyaya heç bir hərbi yardım göstərməməyə çağırıb.

Samir


 

0