Qərbin iki əsas rəqibi - Rusiya və İran yanvarın 17-də - Donald Trampın andiçmə mərasiminə bir neçə gün qalmış İran prezidenti Məsud Pezeşkianın Rusiyaya səfəri zamanı "hərtərəfli strateji tərəfdaşlıq" haqqında saziş imzalamağı planlaşdırır.

HİT.az xəbər verir ki, "Sky News"un məlumatına görə, saziş Moskvanın ötən il Şimali Koreya ilə imzaladığı müqaviləyə bənzəyir, bundan sonra minlərlə Şimali Koreya əsgəri Ukrayna cəbhəsinə göndərilib.

Rusiyadakı Karnegi Avrasiya Mərkəzinin direktoru Aleksandr Qabuyevin nəşrə müsahibəsində bildirdiyi kimi, Rusiyanın xarici siyasətinin əsas təşkilati prinsipi hazırda Ukraynada müharibə aparmaqdır.

"Hər bir ölkə döyüşə nə gətirə biləcəyi prizmasından qiymətləndirilir. Bu ölkə Rusiyaya iqtisadi təzyiqlərə tab gətirməkdə necə kömək edə bilər? Və bu əlaqələrdən Kreml Qərbi cəzalandırmaq üçün necə istifadə edə bilər? İran bu kateqoriyaya mükəmməl uyğun gəlir", deyə nəşr qeyd edib.

ABŞ və Böyük Britaniya artıq Tehranı Moskvanı Ukraynaya qarşı istifadə üçün ballistik raketlər və pilotsuz təyyarələrlə təchiz etməkdə ittiham edib, baxmayaraq ki, həm Rusiya, həm də İran bu iddianı rədd edir.

Bununla belə, yeni əməkdaşlıq sazişi müdafiə sektorunda əlaqələrin gücləndirilməsini nəzərdə tutur. Qabuyevin qeyd etdiyi kimi, nəticədə Rusiya Ukraynada döyüş əməliyyatları üçün lazım olan pilotsuz təyyarələr, pilotsuz təyyarələrin ehtiyat hissələri, raketlər və müxtəlif növ silahları İrandan alacaq. Bunun müqabilində İran Rusiyanın texniki biliklərini alacaq.

Məqalədə qeyd olunur ki, bu razılaşma Qərbə dünyanın dəyişdiyini və Moskvanın fikrincə, ABŞ-ın rəhbərlik etdiyi qaydalara əsaslanan qlobal nizamın dağıldığını xatırladır.

"Putin tez-tez Qərb imperializmindən və Amerika hegemonluğundan azad çoxqütblü dünya yaratmaq istəyindən danışır. O göstərmək istəyir ki, Qərbin Rusiyanı təcrid etmək cəhdlərinə baxmayaraq, onun cəhdləri nəticə verir. Əvvəlcə Şimali Koreya, indi İran - sanksiyalar vasitəsilə həmrəylik", deyə "Sky News" yazıb.

Samir