NATO Rusiyanın Baltikyanı ölkələrə mümkün hücumu halında istifadə olunması nəzərdə tutulan Nato Land Warfighting Concept adlı plan hazırlayıb. 

HİT.az xəbər verir ki, bu barədə Bild nəşri mənbələrinə istinadən məlumat yayıb.

"NATO Rusiyanın Baltikyanı ölkələrə mümkün hücumuna yeni quru müharibəsi konsepsiyasından istifadə etməklə hazırlaşır. Raket zərbələrinin qarşısının alınması, Putinin qoşunlarının sərhəddə dayandırılması və Rusiyanın dərinliklərində təchizat xətlərinin zəiflədilməsi ilə bağlı ətraflı planlar mövcuddur. Pilotsuz uçuş aparatları, avtonom döyüş zonaları və xüsusi təyinatlı qüvvələrin əməliyyatları bu strategiyada əsas rol oynayacaq", - materialda bildirilir.

Konsepsiya amerikalı mayor Endryu Pinqreyin rəhbərliyi ilə hazırlanıb. İlk mərhələdə NATO Qərb istehsalı qırıcılar və yüksək dəqiqlikli silahların köməyi ilə Rusiyanın raket sistemlərinin, dronlarının və aviasiyasının fəaliyyətinin zəiflədilməsinə diqqət yetirməyi planlaşdırır.

Növbəti mərhələdə Rusiya və Belarusla sərhədlər boyunca avtonom bufer zonanın yaradılması nəzərdə tutulur. Bu ərazilərdə hücumun qarşısının birbaşa NATO piyadalarının ön xəttdə iştirakı olmadan pilotsuz maşınlar və robot texnikası vasitəsilə alınması planlaşdırılır.

Bundan başqa, plan Rusiyanın arxa cəbhəsində zərbələrin endirilməsini də nəzərdə tutur. Təchizat xətlərini sıradan çıxarmaq məqsədilə dronlardan və xüsusi təyinatlı qüvvələrdən istifadə edilərək aerodromların, körpülərin, zavodların və dəmir yolu qovşaqlarının məhv edilməsi planlaşdırılır.

Samir