ABŞ prezidenti Donald Trampın administrasiyasının qərarı Avropada Təhlükəsizlik və Əməkdaşlıq Təşkilatında (ATƏT) narahatlıq yaradıb. Təşkilatın ABŞ-da fəaliyyətə başladığı vaxtdan ilk dəfə olaraq 2026-cı ildə Konqresə keçiriləcək aralıq seçkilərini müşahidə etmək üçün ATƏT-ə dəvət göndərilməyib.

HİT.az xəbər verir ki, ATƏT bunu “formalaşmış demokratik praktikadan uzaqlaşma” kimi qiymətləndirib.

ATƏT-in məlumatına görə, ABŞ-ın bu qərarı təşkilata üzv bütün dövlətlərin 1990-cı ildə üzərinə götürdüyü öhdəlikləri pozur. Bu öhdəliklər, xüsusilə, seçki prosesinin təkmilləşdirilməsi məqsədilə beynəlxalq müşahidəçilərin dəvət edilməsini nəzərdə tutur.

2002-ci ildən etibarən ATƏT əməkdaşları ABŞ-da altı aralıq seçki də daxil olmaqla, 12 federal seçkidə müşahidə aparıblar.

ATƏT-in Demokratik Təsisatlar və İnsan Hüquqları Bürosunun (DTİHB) direktoru Mariya Telalyan baş verənlərdən təəssüfləndiyini bildirib:

“Seçkilərin müşahidəsi seçicilərə, seçki orqanlarına, namizədlərə, eləcə də geniş ictimaiyyətə seçki prosesinin müstəqil və obyektiv qiymətləndirilməsini təqdim edir”.

ATƏT Parlament Assambleyasının sədri Pere Xoan Pons da qərardan təəssüfləndiyini ifadə edib:

“Dialoqa sadiq assambleyanın sədri kimi, ABŞ-ın 2026-cı il aralıq seçkilərinin müşahidəsi üçün ATƏT-i dəvət etməməsi qərarından dərin təəssüf hissi keçirirəm. ABŞ-ın federal seçkilərində ATƏT müşahidəçilərini qəbul etdiyi iki onillikdən artıq müddətdən sonra bu qərar formalaşmış demokratik praktikadan əhəmiyyətli dərəcədə uzaqlaşmanı ifadə edir”.

Samir