ABŞ administrasiyası enerji daşıyıcılarının qiymətlərini aşağı salmaq məqsədilə dizel yanacağının ixracına 90 günlük qadağa hazırlayır.
HİT.az xəbər verir ki, bu barədə “Politico” nəşrinə mənbələr məlumat verib.
Qadağanın hüquqi prosedurları hələ hazırlanır. ABŞ yanacaq istehsalçıları bu təşəbbüsə qarşı çıxıblar. Onların sözlərinə görə, qısamüddətli fayda gələcəkdə yanacaq qiymətlərinin daha da artması ilə kompensasiya oluna bilər.
Təchizatın hər hansı şəkildə dayandırılması ABŞ-dan enerji daşıyıcılarının ixracına 2015-ci ildən bəri tətbiq ediləcək ilk məhdudiyyət olacaq. Həmin il ABŞ-ın 44-cü prezidenti Barak Obamanın administrasiyası onilliklər ərzində qüvvədə olan neft ixracına qadağanı ləğv etmişdi.
Bununla yanaşı, hazırkı ABŞ prezidenti Donald Tramp administrasiyasının fevral ayında İrana qarşı başladığı müharibə, eləcə də Ukraynanın Rusiyanın neft emalı zavodlarına hücumları dizel yanacağının qiymətinin rekord səviyyələrə yüksəlməsinə səbəb olub. Bu vəziyyət kənd təsərrüfatı ştatlarından olan respublikaçıları qadağa tətbiq edilməsini tələb etməyə vadar edib.
Aralıq seçkilərə yeddi həftədən az vaxt qaldığı üçün Trampın qadağanı həftənin sonunadək elan etməyə meylli olduğu bildirilir. O, mümkün mənfi nəticələri “dekabr problemi” hesab etməyə hazırdır. Sənaye nümayəndələrindən biri qeyd edib ki, hər şey qərarın qəbul edildiyi anda Trampın yanında kimin olmasından asılı ola bilər.
90 günlük qadağa qısa müddətdə ABŞ-ın bəzi regionlarında dizel yanacağının qiymətinin aşağı düşməsinə səbəb ola bilər. Belə ki, əvvəlcə Avropa və ya Asiyaya yola düşən tankerlər daxili yanacaq sisteminə yönləndirilə və bununla da bazardakı təklifi artıra bilər.
Lakin sonradan neft emalı şirkətləri mühüm ixrac bazarını itirdikləri üçün istehsal həcmlərini azalda bilərlər. Bu isə qiymətlərin yenidən artmasına gətirib çıxara bilər.
Vaşinqtonun dizel ixracına qadağa tətbiq etməsi dünya ölkələrinin ABŞ yanacağından asılılığının artdığı dövrə təsadüf edəcək. Analitiklərin sözlərinə görə, bu addım onsuz da gərgin olan qlobal yanacaq bazarındakı vəziyyəti daha da ağırlaşdıra və qısa müddətdə ABŞ hüdudlarından kənarda qiymətlərin daha da yüksəlməsinə səbəb ola bilər.
Samir
