ABŞ dolları oktyabrın 1-də dövlət istiqrazlarının gəlirliliyinin uzunmüddətli artımı fonunda üç aydan çox müddətin ən yüksək səviyyəsinə çatıb. Bu artıma qismən ABŞ və İsrailin İrana qarşı müharibəsinin yaratdığı davamlı qiymət təzyiqləri ilə bağlı narahatlıqlar səbəb olub.

HİT.az "Reuters"ə istinadən xəbər verir ki, ABŞ-da avqust ayında inflyasiya gözləniləndən daha az artıb. Bu isə Federal Ehtiyat Sisteminin (FED) bu ay əsas faiz dərəcəsini artıracağı ilə bağlı gözləntiləri zəiflədib. Bununla yanaşı, avrozonada inflyasiyanın kəskin yüksəlməsi yüksək enerji qiymətlərinin dünya iqtisadiyyatı üçün yaratdığı təhlükəni bir daha gündəmə gətirib.

"İstiqrazların gəlirliliyi artmaqda davam etdiyi müddətdə bu, dolları dəstəkləyir. Əgər bunun fond bazarına həqiqətən təzyiq göstərməyə başladığı dönüş nöqtəsinə çatsaq, dollar bundan əlavə dəstək əldə edə bilər", deyə "National Australia Bank"ın valyuta bazarı strategiyasının rəhbəri Rey Attrill bildirib.

Qeyd olunur ki, sentyabr ayında qlobal istiqrazlar son illərin ən böyük aylıq enişini nümayiş etdirib və bu da onların gəlirliliyinin artmasına səbəb olub. Buna dövlət maliyyəsinin pisləşməsi, yeni istiqraz buraxılışlarının həddindən artıq çox olması və inflyasiyanın sürətlənməsi kimi amillərin birləşməsi səbəb olub.

ABŞ dollarının əsas valyutalar səbətinə nisbətdə məzənnəsini əks etdirən dollar indeksi 101,66 səviyyəsinə yüksəlib. Bu, iyunun 25-dən bəri ən yüksək göstəricidir. Dollar sentyabr ayında 2 faiz yüksəldikdən sonra artımını davam etdirib.

ABŞ dollarının yenə qarşı məzənnəsi 0,54 faiz artaraq bir dollar üçün 158,29 yenə çatıb. Bu, dolların ötən ay Yaponiya valyutasına qarşı 1,4 faiz ucuzlaşmasından sonra baş verib.

Avstraliya dolları iki ilin minimumuna – 0,6940 ABŞ dollarına qədər geriləyib. Yeni Zelandiya dolları da ucuzlaşaraq 2025-ci ilin noyabrından bəri ən aşağı səviyyəyə – 0,5618 ABŞ dollarına düşüb.

Samir