Hər gün zövq üçün kitab oxumaq yalnız vaxt keçirmək vasitəsi deyil, həm də insanın zehni və emosional bacarıqlarının inkişafına kömək edən vərdiş hesab olunur.

HİT.az xəbər verir ki, psixoloq Emberli Meredit “Parade” nəşrinə açıqlamasında mütaliənin kritik düşünmə qabiliyyətini inkişaf etdirə, narahatlığı azaltmağa və beyni stimullaşdırmağa kömək edə biləcəyini bildirib.

Onun sözlərinə görə, araşdırmalar zövq üçün mütaliənin müsbət emosiyaları gücləndirə, insanın özünü daha yaxşı anlamasına və empatiya qabiliyyətinin inkişafına təsir göstərə biləcəyini göstərir.

Psixoloq hər gün oxuyan insanlarda xüsusilə beş xüsusiyyətin daha çox inkişaf edə biləcəyini qeyd edib:

1. Empatiya

Kitab oxumaq insanlara müxtəlif xarakterlərin necə düşündüyünü və fərqli vəziyyətlərdə hansı hissləri keçirə biləcəyini anlamağa imkan verir. Bu da başqalarının daxili dünyasını daha yaxşı qavramağa və koqnitiv empatiyanı inkişaf etdirməyə kömək edə bilər.

2. Diqqəti cəmləmək

Mütaliə davamlı diqqət tələb edir. Oxucu süjeti izləməli, məlumatları yadda saxlamalı və diqqətini yayındıran amilləri kənarda qoymalıdır. Psixoloqun fikrincə, bu vərdiş sonradan iş, gündəlik tapşırıqlar və digər insanları dinləmək kimi fəaliyyətlərdə də diqqəti qorumağa kömək edə bilər.

3. Zəngin söz ehtiyatı

Daim kitab oxuyan insanlar səhifələrdə qarşılaşdıqları yeni söz və ifadələri təbii şəkildə mənimsəyirlər. Araşdırmalar bunun söz ehtiyatının genişlənməsinə, həmçinin şifahi və yazılı ünsiyyət bacarıqlarının inkişafına müsbət təsir göstərə biləcəyini göstərir.

4. Tənqidi düşüncə

Mütaliə zamanı insan hadisələri qiymətləndirməli, təhlil etməli və onları ümumi kontekstdə nəzərdən keçirməlidir. Bu prosesin davamlı olması oxucunun müxtəlif vəziyyətləri daha analitik şəkildə qiymətləndirməsinə və tənqidi düşünmə bacarıqlarının inkişafına şərait yarada bilər.

5. Yaradıcılıq

Kitab oxumaq insanı fərqli dünyalara aparır və təxəyyülü işə salır. Oxucu təsvir olunan obrazları və hadisələri zehnində canlandırır, fərqli ehtimallar haqqında düşünür və bəzən öz dünyagörüşünü belə sorğulamağa başlayır. Bu baxımdan mütaliənin yaradıcılığın inkişafına töhfə verə biləcəyi bildirilir.

Meredit həmçinin qeyd edib ki, kitab oxumaq stressdən uzaqlaşmaq üçün də faydalı məşğuliyyət ola bilər. Xüsusilə gərgin iş şəraitində çalışan insanlar mütaliə vasitəsilə diqqətlərini gündəlik problemlərdən yayındıra və fərqli bir dünyaya “keçə” bilərlər.

Bununla belə, hər gün kitab oxumaq mümkün deyilsə, insan digər hobbilərə də müraciət edə bilər. Psixoloqun sözlərinə görə, yemək bişirmək, bağçılıq, incəsənət və mebel hazırlamaq kimi fəaliyyətlər də zehni rahatlama və yaradıcılığın inkişafı baxımından faydalı ola bilər.

Samir