Əksər insanların yaşayacağı gözlənilən əhval-ruhiyyə enişini geridə qoymaq üçün günəşli məkana səyahət yaxşı seçim kimi görünür. Lakin eyni zamanda belə istirahət üçün artıq pul ödəmək istəməyənlər də var.

HİT.az xəbər verir ki, “Post Office Travel Money” şirkəti 2026-cı il üzrə “Winter Sun Report” hesabatını yayımlayıb. Hesabatda 24 istiqamətdə turistlərin ən çox aldığı məhsulların – qida, içkilər, günəşdən qoruyucu krem və həşərat qovucu vasitələrin – qiymətləri müqayisə edilib. Araşdırmanın məqsədi turistlərin xərclədikləri vəsait müqabilində ən çox faydanı hansı istiqamətlərdə əldə edə biləcəyini müəyyənləşdirmək olub.

Bu il birinci yeri Cənubi Afrikanın Keyptaun şəhəri tutub. İkinci yerdə Keniyanın Mombasa şəhəri qərarlaşıb. Araşdırmanın müəllifləri Tokio şəhərini də siyahıya daxil ediblər. Bununla belə, məqalənin müəllifi Yaponiya paytaxtının qış günəşi istiqaməti kimi müəyyənləşdirilməsi ilə tam razı olmadığını qeyd edir. Eyni zamanda Tokioda qış aylarının bəzi Avropa ölkələri ilə müqayisədə nisbətən mülayim keçdiyi vurğulanır. Tokio üçüncü yeri tutub.

Reytinqdə növbəti yerlərdə Şri-Lankanın Kolombo şəhəri və Tailandın Pxuket adası qərarlaşıb.

Avropa istiqamətləri arasında ən yüksək mövqeni Portuqaliyanın Alqarve bölgəsi tutub – altıncı yer. Ondan sonra İspaniyanın Kosta-del-Sol bölgəsi və Kanar adalarında yerləşən Tenerif adası gəlir.

Daha uzaq istiqamətlər arasında Dominikan Respublikasının Punta-Kana şəhəri doqquzuncu yeri tutub. İlk onluğu isə Malayziyanın Penanq adası tamamlayıb.

Reytinqin digər ucunda qış istirahəti üçün ən bahalı istiqamətlər yer alıb. Bunların arasında Trinidad və Tobaqodakı Skarboro, Qrenadadakı Sent-Corces və Madeyradakı Funşal şəhərləri var.

2026-cı ildə qış istirahəti üçün ən sərfəli istiqamətlər:

1. Keyptaun, Cənubi Afrika
2. Mombasa, Keniya
3. Tokio, Yaponiya
4. Kolombo, Şri-Lanka
5. Pxuket, Tailand
6. Alqarve, Portuqaliya
7. Kosta-del-Sol, İspaniya
8. Tenerif, Kanar adaları
9. Punta-Kana, Dominikan Respublikası
10. Penanq, Malayziya

Samir