Psixopatik xüsusiyyətlərə malik insanlar hər zaman təhlükəli cinayətkar obrazına uyğun gəlmirlər. Onlar cəmiyyətdə uğurlu ola, ünsiyyətcil görünə və uzun müddət öz davranışlarının fərqli tərəflərini fərq etməyə bilərlər. Mütəxəssislər isə empatiyanın zəifliyi, günahkarlıq hissinin az olması və başqalarının duyğularını anlamaqda çətinlik çəkməyi diqqətçəkən xüsusiyyətlər sırasında göstərirlər.

HİT.az-ın "BBC Science Focus"a istinadən yaydığı məlumata görə, psixologiya üzrə mütəxəssislər psixopatik xüsusiyyətlərin müxtəlif səviyyələrdə təzahür edə biləcəyini bildirirlər. Bu xüsusiyyətlərə sahib olmaq avtomatik olaraq şəxsiyyət pozuntusu və ya cinayətə meyillilik demək deyil.

Psixopatiyanın mümkün əlamətlərindən biri başqalarına zərər vurduqda günahkarlıq hissinin zəif olmasıdır. Belə insanlar etdikləri hərəkətlərin başqalarına təsirini lazımi səviyyədə qiymətləndirməyə bilərlər. Digər əlamət isə öz maraqlarını daim başqalarının maraqlarından üstün tutmaqdır. Bu zaman insan şəxsi məqsədlərinə çatmaq üçün ətrafındakıların ehtiyaclarını nəzərə almaya bilər.

Mütəxəssislərin diqqət çəkdiyi digər xüsusiyyətlər arasında ədalətli davranmaqdan daha çox qalib gəlməyə önəm vermək, başqalarının hisslərinə təsir göstərmək və insanları istədiklərini etməyə yönləndirmək bacarığından istifadə etmək yer alır. Həmçinin güclü özünəinam, təzyiq altında soyuqqanlı qalmaq və məqsədə çatmaq üçün həddindən artıq riskə getməyə hazır olmaq da mümkün əlamətlər sırasında göstərilir.

Psixopatik xüsusiyyətləri müəyyənləşdirməyi çətinləşdirən amillərdən biri belə insanların zahirən cazibədar və inandırıcı görünə bilməsidir. Psixoloqlar qeyd edirlər ki, onlar başqalarının emosiyalarını tanısalar da, həmin hissləri eyni dərəcədə yaşamaya bilərlər. Bu isə ətrafdakıların narahatlığını və ya kədərini anlamaqda çətinlik yaratmağa səbəb ola bilər.

Bununla belə, soyuqqanlılıq, riskə meyillilik və yüksək özünəinam kimi xüsusiyyətlər təkbaşına psixopatiya göstəricisi sayıla bilməz. Bəzi insanlar gərgin şəraitdə daha yaxşı qərarlar verə bilsələr də, bu, onların psixopatik xüsusiyyətlərə malik olduqlarını göstərmir.

Mütəxəssislər bildirirlər ki, psixopatik xüsusiyyətlər zamanla dəyişə bilər. Bəzi insanlarda bu xüsusiyyətlər zəifləyir, digərlərində isə uzun müddət davam edir. Buna görə də insanın özündə və ya başqasında bir neçə uyğun əlamət müşahidə etməsi əsasında nəticə çıxarmaq düzgün deyil. Psixopatiya ilə bağlı qiymətləndirmə mütəxəssis tərəfindən aparılmalıdır.

Samir