Ağıllı analar övladlarına bu 7 vacib həyat bacarığını aşılayır

SOSİAL
19:58 / 18.11.2026
42

Uşağın gələcəkdə uğurlu və müstəqil insan kimi formalaşması yalnız məktəb qiymətlərindən və əlavə məşğələlərdən asılı deyil. Ailə mühiti, valideynlərin davranışları və uşağa aşıladığı həyat prinsipləri də bu prosesdə mühüm rol oynayır.

HİT.az xəbər verir ki, bu barədə “YourTango” nəşrində dərc olunan yazıda psixoloqların fikirlərinə istinadla məlumat verilib.

Mütəxəssislər hesab edirlər ki, emosional intellektin formalaşmasında anaların davranışları xüsusi əhəmiyyət daşıyır. Özünə hörmət edən, çətinliklər qarşısında soyuqqanlılığını qoruyan və düzgün qərarlar verən analar övladlarına yetkinlik dövründə lazım olacaq vərdişləri də öyrədirlər.

Analardan uşaqlara ötürülən 7 mühüm həyat dərsi:

1. Xeyirxahlıq özündən keçmək demək deyil

Uşaqlar başqalarına qarşı mehriban olmağın vacibliyini anlamalıdırlar. Ancaq bu, insanların onlardan sui-istifadə etməsinə imkan vermək anlamına gəlmir. Analar övladlarına şəxsi sərhədlərini qorumağı, lazım gəldikdə “yox” deməyi və özlərinə hörmət etməyi öyrətməlidirlər.

2. Başqalarının məsləhətləri ilə kor-koranə hərəkət etmək olmaz

Dostların və yaxınların fikirlərini dinləmək faydalıdır. Lakin hər kəs insanın şəxsi vəziyyətini və imkanlarını tam qiymətləndirə bilməz. Buna görə uşaqlar məsləhətləri nəzərə almağı, amma son qərarı müstəqil verməyi bacarmalıdırlar.

3. Şəxsi həyatın bütün detalları paylaşılmamalıdır

Açıq olmaq sağlam münasibətlərin qurulmasına kömək etsə də, insan hər şeyi ətrafındakılarla bölüşməyə məcbur deyil. Uşaqlar kimə, hansı məlumatı etibar edə biləcəklərini müəyyənləşdirməyi və şəxsi həyatlarının sərhədlərini qorumağı öyrənməlidirlər.

4. Vacib qərarlar emosiyaların təsiri altında verilməməlidir

Güclü həyəcan, qəzəb və ya qorxu insanı tələsik qərarlar verməyə sövq edə bilər. Psixoterapevt Moşe Ratsonun fikrincə, emosiyalar vəziyyəti anlamağa kömək etsə də, ciddi qərarların yeganə meyarına çevrilməməlidir. Belə hallarda əvvəlcə sakitləşmək, sonra düşünərək addım atmaq vacibdir.

5. Pulu düzgün idarə etməyi bacarmaq lazımdır

Yüksək gəlir həmişə maliyyə sabitliyi demək deyil. Xərcləri planlaşdırmaq, qənaət etmək və gələcək üçün pul toplamaq bacarığı uşaqlara erkən yaşlardan aşılanmalıdır. Maliyyə savadlılığı müstəqil həyatın əsas şərtlərindən biridir.

6. Başqalarının rəğbətini qazanmaq üçün prinsiplərdən imtina etmək olmaz

Xüsusilə yeniyetməlik dövründə ətrafdakılar tərəfindən qəbul olunmaq istəyi güclənir. Lakin başqalarına xoş görünmək naminə şəxsi dəyərlərdən və inanclardan uzaqlaşmaq düzgün deyil. Analar uşaqlarına həmyaşıdlarının təzyiqinə qarşı dayanmağı və öz prinsiplərinə sadiq qalmağı öyrətməlidirlər.

7. Başqalarının fikrindən həddindən artıq asılı olmaq olmaz

Daim ətrafdakıların təsdiqini gözləmək insanın özünəinamına və müstəqilliyinə mane ola bilər. Neyrobioloq Daniel Qleyzerin fikrincə, məqsəd başqalarının fikirlərini tamamilə görməzdən gəlmək deyil, həqiqətən əhəmiyyətli insanların rəylərini düzgün qiymətləndirməkdir.

Mütəxəssislər vurğulayırlar ki, uşaqlar bu bacarıqları yalnız valideynlərin nəsihətləri ilə deyil, onların gündəlik davranışlarını müşahidə etməklə də mənimsəyirlər. Buna görə də anaların öz həyatlarında nümayiş etdirdikləri davranış nümunələri övladlarının gələcək xarakterinin formalaşmasına təsir göstərir.

Samir
 

0