Qazaxıstan heç bir ittifaq dövləti yaratmaq və ya onlara qoşulmaq niyyətində deyil, bunu planlaşdırmır. 

HİT.az “RİA Novosti”yə istinadən xəbər verir ki, bu barədə respublika prezidentinin mətbuat katibi Ruslan Jeldibai bildirib.

Mayın 25-də Qazaxıstan prezidenti Kasım-Jomart Tokayev Moskvada Ali Avrasiya İqtisadi Şurasının plenar iclasında iştirak edib. Daha sonra dövlət başçısı Avrasiya İqtisadi İttifaqı (Aİİ) çərçivəsində müxtəlif səviyyəli inteqrasiyanın mövcud olduğunu bəyan edərək, Rusiya və Belarusun ittifaq dövlətinin birlikdə olmasına diqqət çəkib.

Ruslan Jeldibai bildirib ki, həqiqətən də bu gün Aİİ-nin iki üzvü - Rusiya və Belarus yaxınlaşmanın daha yüksək və daha sıx səviyyəsini nümayiş etdirir: "Bu, unikal presedentdir. Dövlət başçısının qeyd etdiyi kimi, əslində söhbət bir xalqdan və dövlətdən gedir. Və bu baxımdan, tamamilə fərqli məqsədlərə malik iki inteqrasiya layihəsi çərçivəsində təşəbbüsləri ayırmaq çox vacibdir".

"Dövlət başçısının əsas mesajı ondan ibarətdir ki, Aİİ daxilində inteqrasiya yalnız iqtisadi yolda gedə bilər və getməlidir. Çərçivəsindən kənara çıxmaq təşkilatın nizamnamə sənədlərinin məqsəd, prinsip və vəzifələrini pozur. Prezidentin də vurğuladığı kimi, iqtisadi inteqrasiya özlüyündə məqsəd deyil, iqtisadiyyatları inkişaf etdirmək, xalqlarımızın rifahını yaxşılaşdırmaq vasitələrindən biridir. Yəni, assosiasiya çərçivəsində qəbul edilən istənilən qərar hər bir fərdi iştirakçı və ilk növbədə bütün Aİİ dövlətlərinin vətəndaşları üçün nəticə verməlidir", deyə Ruslan Jeldibai bildirib.

Samir