Böyük Britaniyada yay mövsümü artıq təkcə günəş yanıqları və yüksək temperaturla deyil, son dövrlərdə artan ilan hadisələri ilə də yadda qalır. İsti hava dalğalarının təsiri nəticəsində evlərdən qaçan və ya təbii yaşayış mühitində daha çox görünən ilanlar əhali arasında narahatlıq yaradır.
HİT.Az xəbər verir ki, heyvanların rifahı ilə məşğul olan “RSPCA” təşkilatının açıqladığı son məlumatlar sürünənlərlə bağlı hadisələrin nəzərəçarpacaq dərəcədə artdığını göstərir. Təşkilatın statistikasına əsasən, 2024-cü ildə ilanlarla bağlı müraciətlərin sayı 980 olduğu halda, 2025-ci ildə bu göstərici 1 485-ə yüksəlib.
Bu hadisələrin böyük hissəsi — 905 müraciət — may və sentyabr ayları arasındakı isti dövrə təsadüf edib. “RSPCA”nın baş elmi əməkdaşı İvi Batton bildirib ki, temperatur yüksəldikcə sürünənlər bioloji baxımdan daha aktiv olurlar. Onun sözlərinə görə, evdə ilan saxlayanlar bu dövrdə daha məsuliyyətli davranmalıdırlar.
Mütəxəssislər qeyd edirlər ki, ilanlar saxlandıqları yerdən qaçmaqda olduqca bacarıqlıdır. Sahiblərinin onları təbii günəş işığından faydalanmaları üçün kifayət qədər təhlükəsizlik tədbirləri görmədən açıq havaya çıxarması ciddi risk yaradır. İsinən ilanlar daha sürətlə hərəkət edir və qısa müddətdə gözdən itə bilirlər.
Müraciətlərin təxminən 20 faizi birbaşa qaçan və ya itən ilanlarla bağlıdır. Digər müraciətlər isə qulluq tövsiyələri, yaralanmalar və ya tərk edilmiş sürünənlərlə əlaqədardır.
Mütəxəssislər xatırladırlar ki, ilan kimi ekzotik heyvanların saxlanılması düşünüldüyündən daha çətindir. İsitmə sistemi, işıqlandırma, xüsusi qidalanma və uyğun yaşayış şəraiti də daxil olmaqla bütün tələblər dəqiq yerinə yetirilməlidir. Lazımi şərait təmin edilmədiyi üçün tərk edilən heyvanlar həm onların rifahını təhlükə altına qoyur, həm də cəmiyyətdə narahatlıq yaradır.
Qaçan ev heyvanları ilə yanaşı, Böyük Britaniyanın yerli ilan növləri də yay aylarında daha çox gözə dəyir. Yerli zəhərli gürzələr və ot ilanları bəzən sakinlər tərəfindən evdən qaçmış ekzotik ilanlarla səhv salınır. Bu isə insanlar və ilanlar arasında təmas ehtimalını artırır.
Bu yaxınlarda baş vermiş hadisələrdən biri yerli ilanların yaratdığı təhlükəni bir daha gündəmə gətirib. “Suffolk” bölgəsində dostu ilə kanoe gəzintisi zamanı fasilə verən Zak Braun otlu sahəyə ayaq basarkən qəfil güclü ağrı hiss edib. Sonradan məlum olub ki, onu gürzə sancıb.
Antizəhər müalicəsi sayəsində həyatı xilas edilən Zak Braun yaşadığı ağrını və ayağının "fil ayağı" kimi şişdiyini bildirib. O, təbiətdə vaxt keçirən hər kəsi daha diqqətli olmağa çağırıb.
Mütəxəssislər ilanla qarşılaşdıqda təşvişə düşməməyi, onların təbii yaşayış mühitinə müdaxilə etməməyə çalışaraq, xüsusilə hündür otlu ərazilərdə ehtiyatlı davranmağı tövsiyə edirlər. İlan saxlamaq istəyən şəxslərə isə heyvanı sahiblənməzdən əvvəl onun saxlanma şəraiti və ehtiyacları barədə ətraflı araşdırma aparmaları məsləhət görülür.
Samir
