Güclü hisslər hər zaman həqiqi sevginin göstəricisi deyil. Bəzən insanlar qarşı tərəfi ideallaşdırır, onun çatışmazlıqlarını görməzdən gəlir və zamanla emosional asılılıq yaşayırlar. Psixoloq Vitali Storçeusov münasibətlərdə belə vəziyyətin beş əsas əlamətini açıqlayıb.

HİT.az xəbər verir ki, bu barədə Ukraynanın UNİAN nəşri məlumat yayıb.

Psixoloqun sözlərinə görə, insan bəzən sevdiyi şəxsin real xarakterinə deyil, öz zehnində yaratdığı ideal obrazına bağlanır. Bu isə münasibətlərdə narahatlıq və məyusluğa səbəb ola bilər.

Birinci əlamət – səbəbsiz kədər və məyusluqdur. İnsan tərəfdaşının çatışmazlıqlarını görmək istəməsə də, daxili narahatlıq və mənfi emosiyalar münasibətlərdə nəyinsə qaydasında olmadığını göstərə bilər.

İkinci əlamət – həyat keyfiyyətinin pisləşməsidir. Münasibətlər davamlı gərginlik, narahatlıq və yuxu problemləri yaradırsa, bunun səbəblərini araşdırmaq vacibdir.

Üçüncü əlamət – tərəfdaşı qüsursuz hesab etməkdir. Münasibətlərin ilk mərhələsində qarşı tərəfi ideallaşdırmaq müəyyən qədər təbii sayıla bilər. Lakin aylar keçməsinə baxmayaraq, onun çatışmazlıqlarını görməmək və ya heyranlığın qəfil nifrətə çevrilməsi sağlam olmayan münasibət dinamikasına işarə edə bilər.

Dördüncü əlamət – tərəfdaşın həyatın mərkəzinə çevrilməsidir. İnsan bütün vaxtını və düşüncələrini sevdiyi şəxsə yönəldir, digər maraqlarını və gündəlik həyatını arxa plana keçirirsə, bu, emosional asılılıq ehtimalını artırır.

Beşinci əlamət – şəxsi maraqların və dəstək mənbələrinin itirilməsidir. Dostlarla ünsiyyətdən, hobbilərdən və ailə ilə münasibətlərdən uzaqlaşaraq bütün emosional ehtiyacları yalnız tərəfdaş vasitəsilə qarşılamağa çalışmaq insanın özünü münasibətlərdən həddindən artıq asılı vəziyyətə salmasına səbəb ola bilər.

Həqiqi sevgi ilə vurğunluğun fərqi

Storçeusov bildirir ki, vurğunluq güclü ehtiras və cəlbedicilik hissi ilə bağlıdır. Bu mərhələdə tərəflər bir-birini ideallaşdıra bilərlər. Lakin sağlam münasibətdə insan öz sərhədlərini qorumaq və vəziyyəti obyektiv qiymətləndirmək qabiliyyətini itirmir.

Psixoloqun sözlərinə görə, emosional bağlılıq və ya asılılıq cəmi iki həftəlik ünsiyyət ərzində də yarana bilər. Həqiqi sevgi isə zamanla, tərəflər bir-birini daha yaxından tanıdıqda, çətinliklərlə qarşılaşdıqda və birgə qərarlar qəbul etdikdə formalaşır.

Mütəxəssis vurğulayır ki, münasibətlərin nə dərəcədə sağlam olduğunu anlamaq üçün tərəfdaşın müxtəlif vəziyyətlərdə necə davrandığına, problemləri müzakirə etməyə və ortaq həll yolları tapmağa nə qədər hazır olduğuna diqqət yetirmək lazımdır.

Eyni zamanda, insanın özünəhörmətini və şəxsi sərhədlərini qoruması vacibdir. Münasibət naminə şəxsi ehtiyacları davamlı olaraq görməzdən gəlmək, narazılığı gizlətmək və öz həyatından imtina etmək sağlam yaxınlığın göstəricisi deyil.

Psixoloqun fikrincə, həqiqi sevgi yalnız güclü hisslərdən ibarət deyil. Bu, qarşı tərəfi olduğu kimi tanımaq, onun üstünlükləri və çatışmazlıqlarını qəbul etmək, qarşılıqlı hörmət əsasında münasibət qurmaq və eyni zamanda şəxsi müstəqilliyi qorumaq bacarığıdır.

Samir