Böyük Britaniya bəzi qaçqınları sığınacaq müraciətlərinə baxıldığı müddətdə onların saxlanmasına xərclənən vəsaitləri dövlətə kompensasiya etməyə məcbur edəcək. 

HİT.az xəbər verir ki, bu barədə Britaniya hökumətinin açıqlamasında bildirilir.

Müvafiq norma "Immigration and Asylum Bill" qanun layihəsinə daxil edilib. Sənəd Daxili İşlər Nazirliyinə yaşayış və ya qida təminatı üçün ödənişlər almış yetkin şəxslərdən pul tələb etmək hüququ verir. Lakin bu, yalnız şəxsin maddi baxımdan bunu ödəmək imkanının olduğu halda tətbiq ediləcək.

Qeyd olunur ki, gözlənilən kompensasiya məbləği təxminən 10 min funt sterlinq (təxminən 11 min avro) təşkil edir.

"Biz artıq sığınacaq xərclərini 1 milyard funt sterlinq azaltmışıq, lakin töhfə verə bilən şəxslərdən bunu etmələrini istəmək də doğrudur. Sığınacaq yardımı almaq hüquqdur, amma bu, həm də məsuliyyətdir", - hökumətin açıqlamasında deyilir.

London hakimiyyəti vurğulayır ki, qaçqınlara dəstək yalnız hüquq deyil, həm də bunu dövlətlə bölüşə biləcək şəxslərin məsuliyyətidir.

Məlumata görə, 2015-2023-cü illər arasında qaçqın statusu almış 16-64 yaş arası şəxslərin hər dörd nəfərindən biri status aldıqdan sonra ilk il ərzində işlə təmin olunub. Daha sonra bu göstərici artır: iki ildən sonra işləyənlərin payı təxminən 50 faizə çatır.

Açıqlamada daha bir göstərici qeyd olunur: status aldıqdan səkkiz il sonra işləyən şəxslərin 37 faizi tam iş günü çalışıb və onların orta illik gəliri 23 min funt sterlinq təşkil edib.

Eyni zamanda hökumət qaçqınların müvəqqəti yerləşdirilməsi üçün istifadə olunan otellərin sayını azaltmağa davam edir. Aprel ayından etibarən artıq 31 belə müəssisə bağlanıb. Bəzi sakinlər daha sadə yaşayış yerlərinə, o cümlədən əvvəllər hərbi məqsədlər üçün istifadə olunan binalara köçürülüb.

Samir