Dələlərin ömür uzunluğu onların növündən, yaşadığı mühitdən və bir sıra digər amillərdən asılıdır. Mütəxəssislər bildirirlər ki, vəhşi təbiətdə yaşayan dələlərin əksəriyyəti ilk ilini belə başa vura bilmir.

Hit.az xəbər verir ki, "Birds & Blooms Magazine" nəşrinin yazdığına görə, ən geniş yayılmış növlərdən biri olan şərq boz dələsi orta hesabla altı il yaşayır. Qida, su və sığınacağa sabit çıxışı olduqda isə ömrü 12 ilə qədər uzana bilər.

Qırmızı dələlər adətən 4–5 il yaşayır. Tülkü dələlərinin vəhşi təbiətdə maksimum ömrü yeddi ilə çatsa da, onların əksəriyyəti 3–4 il yaşayır. Yer dələlərinin ömür uzunluğu da təxminən bu qədərdir.

Uçan dələlərin ömrü isə növündən asılı olaraq dəyişir. Cənub uçan dələləri adətən 3–5 il, şimal uçan dələləri isə 4–6 il yaşayır.

Əsirlikdə, məsələn, vəhşi heyvanların reabilitasiya mərkəzlərində yaşayan dələlərin ömrü xeyli artır. Boz dələlər 20 ilədək, tülkü dələləri isə 18 ilədək yaşaya bilir ki, bu da onların vəhşi təbiətdəki maksimum ömründən iki dəfədən çoxdur.

Dələlərin sağ qalmasına nə təsir edir?

Məqalədə qeyd olunur ki, göstərilən rəqəmlər əsasən ilk ilini sağ başa vurmuş fərdlərə aiddir. Halbuki dələlərin böyük hissəsi bu mərhələyə çatmır.

Məsələn, boz dələlərdə ilk ili sağ qalmaq ehtimalı cəmi 25 faizdir. Əgər onlar bu dövrü keçə bilirlərsə, sonrakı illərdə sağ qalma ehtimalı təxminən 50 faizə yüksəlir.

Dələlərin çoxsaylı təbii düşmənləri var. Onları tülkülər, koyotlar, şahinlər və bayquşlar kimi yırtıcı quşlar ovlayır. İlanlar isə xüsusilə bala dələlər üçün təhlükə yaradır.

Bundan əlavə, dələlər aclıq, xəstəliklər və ərazi uğrunda mübarizə zamanı aldıqları xəsarətlər nəticəsində də həyatlarını itirə bilirlər.

İnsan fəaliyyəti də onların sağ qalmasına təsir göstərir. Avtomobillər, ev itləri və bəzi bölgələrdə tətbiq olunan ov mövsümü dələlər üçün əsas təhlükələr sırasında göstərilir.

Samir