Sakit okeanda formalaşan El Nino iqlim hadisəsi bu il miqyasına və mümkün nəticələrinə görə tarixdə görünməmiş səviyyəyə çata bilər. Alimlər artıq okean səthində rekord temperatur göstəricilərini qeydə alırlar və hadisə quru ərazilərə təsir göstərməyə başladıqda hava şəraitində ciddi dəyişikliklər gözlənilir. 

Hit.az xəbər verir ki, bu barədə "USA TODAY" iqlimşünaslara və son tədqiqatlara istinadən məlumat yayıb.

Mütəxəssislərin sözlərinə görə, okean səthinin temperaturu artıq adətən çox güclü El Nino epizodlarına uyğun olan həddi keçib. Tədqiqatçı Zik Hausfater hesab edir ki, hazırkı proses indiyədək müşahidə olunan bütün göstəriciləri geridə qoya bilər.

"Bu hadisənin etibarlı müşahidələr aparılmağa başlandıqdan bəri ən güclüsü olacağı ehtimalı çox yüksəkdir. Hətta əvvəlki rekordları böyük fərqlə üstələyə bilər",  deyə klimatoloq bildirib.

Alimlər qeyd edirlər ki, El Ninonun dünya üzrə hava şəraitinə real təsiri növbəti 12–18 ay ərzində daha aydın görünəcək. Bununla belə, onlar artıq 2026-cı ilin müşahidələr tarixində ən isti il olacağını, 2027-ci ilin isə böyük ehtimalla bu rekordu da yeniləyəcəyini proqnozlaşdırırlar.

Mütəxəssisləri xüsusilə narahat edən məqam güclü El Ninonun qlobal istiləşmə fonunda baş verməsidir.

Kaliforniya Universitetinin klimatoloqu Daniel Sveyn bildirib:

"Onsuz da rekord dərəcədə yüksək qlobal temperatur fonunda potensial rekordçu El Nino son dərəcə ciddi vəziyyət yaradır."

Alimlərin fikrincə, güclü El Nino dünyanın müxtəlif bölgələrində hava şəraitini əhəmiyyətli dərəcədə dəyişə bilər. Mümkün nəticələr arasında uzunmüddətli isti dalğaları, güclü yağıntılar, dağıdıcı daşqınlar, quraqlıqlar və genişmiqyaslı meşə yanğınları yer alır. Bununla yanaşı, hadisə Atlantik okeanında qasırğaların sayını azalda bilsə də, Sakit okeanın şərq hissəsində onların sayının artacağı gözlənilir.

Ekspertlər iqtisadi nəticələrin də ciddi ola biləcəyi barədə xəbərdarlıq edirlər. Dartmut Kollecinin professoru Castin Menkin hesab edir ki, bu dövr kənd təsərrüfatı, balıqçılıq və infrastruktur sahələrinə dəyəcək zərərlər səbəbindən tarixdə ən bahalı El Nino ola bilər.

Bununla belə, alimlər yekun nəticələr çıxarmağa tələsməməyi tövsiyə edirlər. Bütün əlamətlər hadisənin tarixdə ən güclü El Nino olacağını göstərsə də, onun inkişaf ssenarisi hələ də tam müəyyənləşməyib.

Samir