II Dünya müharibəsi zamanı batan gəminin tarixçəsi yaratdığı təhlükə səbəbindən hələ də diqqət mərkəzində qalır. Söhbət bombalar və sursatlarla yüklənmiş, bu günədək La-Manş boğazının dibində qalan batmış gəmidən gedir. 

HİT.az xəbər verir ki, bu barədə "Antena3" məlumat yayıb.

Məlumata görə, güclü partlayış bir neçə ərazini silkələyib və sualtı relyefi həmişəlik dəyişib.

"ABŞ-da 1943-cü ildə inşa edilən "SS Kielce" gəmisi İkinci Dünya müharibəsi zamanı Polşa bayrağı altında üzən yük gəmisi olub. Mənbənin məlumatına görə, 1946-cı il martın 5-dən 6-na keçən gecə gəmi "Lombardy" paroxodu ilə toqquşub və bomba və sursat daşıdığı vaxt Folkston şəhəri yaxınlığında batıb", deyə materialda qeyd olunur.

"SS Kielce" gəmisinin heyəti xilas ola bilib, lakin batmış gəminin içərisində qalan partlayıcı maddələr hadisədən 21 il sonra təmizləmə əməliyyatını böyükmiqyaslı sualtı partlayışa çevirib.

"1967-ci il iyulun 22-də xilasetmə qrupları deformasiyaya uğramış gəmi gövdəsini deşmək üçün partlayıcı maddədən istifadə etdilər. Üçüncü partlayış gəmidəki sursatların bir hissəsinin detonasiyasına səbəb oldu, Folkston şəhərində binalara ziyan vurdu və Avropa ilə Şimali Amerikadakı seysmik stansiyalar tərəfindən qeydə alınan zərbə dalğaları yaratdı", deyə "Daily Galaxy" nəşrinin jurnalistləri əlavə ediblər.

Partlayış, xüsusilə, 25 seysmik müşahidə məntəqəsi tərəfindən qeydə alınıb. Mütəxəssislər zəlzələlərin ölçülməsi üçün istifadə edilən üsullara bənzər metodlardan istifadə edərək partlayışın gücünü təxminən 4,5 maqnitudada qiymətləndiriblər.

Bu göstərici gəmidəki ümumi sursat miqdarını deyil, qeydə alınmış seysmik enerjini əks etdirir.

"İstintaqın nəticələrinə dair rəsmi hesabatda kraterin ölçüləri sualtı partlayış sınaqları zamanı əldə edilən məlumatlarla müqayisə edilib və belə qənaətə gəlinib ki, bu, təxminən 2000 ton trotilə ekvivalent partlayışa uyğun gəlir. Lakin hesabat müəllifləri vurğulayırlar ki, bu, gəmidə məhz belə böyük miqdarda sursatın partladığı anlamına gəlmir", deyə nəşrdə izah olunub.

Xoşbəxtlikdən, hadisə nəticəsində heç kim xəsarət almayıb. Lakin partlayış batmış gəminin qalıqlarını ətrafa səpələyib və uzunluğu 47 metr, eni 20 metr, dərinliyi isə 6 metr olan krater yaradıb.

"Kraterin kənarları adi dəniz dibinin səviyyəsindən bir neçə metr yuxarı qalxmışdı. Partlayış zamanı gəminin qalıqları təxminən 27 metr dərinlikdə lil qatının üzərində yerləşirdi. Təxminən 60 il əvvəl baş verən bu hadisə sualtı mühitdə partlamamış sursatların yaratdığı risklərin öyrənilməsi üçün faydalı nümunə olaraq qalır", deyə nəşr yekunlaşdırıb.

Samir